سیتا پور: جمعرات کو سیتا پور جیل میں اعظم خان سے ملنے آئے کانگریس کے ریاستی صدر اجے رائے کو خالی ہاتھ واپس جانا پڑا۔ جیل انتظامیہ کا کہنا تھا کہ اعظم خان نے صرف اپنے اہل خانہ سے ملنے کے لیے کہا تھا، جب کہ اجے رائے نے کہا کہ بی جے پی حکومت کے کہنے پر انھیں ملنے نہیں دیا جا رہا ہے۔ دوسری جانب جیل سپرنٹنڈنٹ نے کہا کہ ملاقات کے حوالے سے کانگریس کی جانب سے کوئی میل یا خط موصول نہیں ہوا ہے۔ اجے رائے کی جیل انتظامیہ سے کافی دیر تک بحث ہوتی رہی لیکن انہیں اعظم سے ملنے نہیں دیا گیا۔
آپ کو بتا دیں کہ فرضی برتھ سرٹیفکیٹ کیس میں ایس پی لیڈر اعظم خان، ان کی اہلیہ تنظیم فاطمہ اور بیٹے عبداللہ اعظم کو 7-7 سال قید کی سزا سنائی گئی ہے۔ سزا کے بعد سبھی کو سیتا پور جیل لایا گیا ہے۔ کانگریس کے ریاستی صدر اجے رائے کی اعظم خان سے ملاقات نہ کرنے پر کارکنوں میں غصہ تھا۔
کانگریس کے ریاستی صدر اجے رائے نے کہا کہ اعظم کو یوگی حکومت دشمنی کی وجہ سے ٹارچر کر رہی ہے۔ اس کے خلاف وہ اعظم کے ساتھ کھڑے ہیں۔ کانگریس کے ریاستی صدر نے الزام لگایا کہ جیل سپرنٹنڈنٹ سریش سنگھ سے بات کی گئی لیکن بغیر کسی وجہ کے ملاقات سے انکار کر دیا گیا۔ اس سے ناراض کانگریسی کارکنوں نے حکومت اور انتظامیہ کے خلاف نعرے بازی بھی کی۔
کانگریس کے ریاستی صدر اجے رائے اعظم خان کو تحفے میں پھلوں کی ٹوکری اپنے ساتھ لے گئے تھے۔ ملاقات نہ ہونے پر یہ ٹوکری جیل انتظامیہ کے حوالے کر دی گئی۔ امید ظاہر کی کہ یہ پھل اعظم خان تک پہنچیں گے۔ اس دوران اجے نے کہا کہ اعظم مجرم نہیں ہیں۔ وہ اتر پردیش کے طاقتور لیڈر ہیں۔ ہم یہاں انسانیت کا مذہب بن کر آئے ہیں۔
یہ بھی پڑھیں: اعظم خان اور ان کا بیٹا دوسری جیل منتقل، کہا ہمارا بھی انکاؤنٹر ہو سکتا ہے
اجے رائے نے کہا کہ کانگریس اپنے آغاز سے ہی ناانصافی اور مظالم کے خلاف لڑ رہی ہے۔ ہماری لیڈر پرینکا گاندھی اتر پردیش میں ہاتھرس، اُمبھا، اناؤ، لکھیم پور، شاہجہاں پور واقعات کے متاثرین کو انصاف دلانے پہنچیں۔ آپ کو بتا دیں کہ ان کے بڑے بیٹے ادیب اعظم بدھ کو اعظم خان سے ملنے آئے تھے۔ ایس پی کے سابق ایم ایل اے انوپ گپتا بھی ان کے ساتھ تھے۔
