ضلع گوتم بدھ نگر میں گذشتہ روز مسلسل بارش ہوتی رہی۔
اتوار کی صبح اچانک موسم نے کروٹ لی۔ سیاہ بادل آسمان پر چھا گئے اور تیز ہواؤں اور گرج و چمک کے ساتھ بارش شروع ہوگئی۔
بارش کی وجہ سے قومی دارالحکومت دہلی اور این سی آر سمیت اتر پردیش کے دیگر اضلاع میں بھی سردی میں اضافہ ہوا ہے۔
بارش کی وجہ سےسڑکوں پر ٹریفک جام ہوگیا۔ کام کاجی لوگوں کو دفتر جانا مشکل ہوگیا۔
موسم ابر آلود ہونے کے باعث دن میں ہی اندھیرا چھا گیا اور سردی میں بھی شدت آگئی۔ بیشتر لوگ اپنے اپنے گھروں میں محصور رہے۔
بارش کے ساتھ ساتھ تیز ہوا چل رہی ہے۔ بارش کی وجہ سے درجہ حرارت 16 ڈگری سینٹی گریڈ سے کم ہوکر 10 ڈگری سینٹی گریڈ ہو گیا۔
محکمہ موسمیات کے مطابق پہاڑی علاقوں میں ژالہ باری ہو رہی ہے، جس کی وجہ سے آئندہ دو دنوں تک وقفہ وقفہ سے بارش ہوتی رہے گی۔
مزید پڑھیں:ڈاکٹر بشیر بدر نے پی ایچ ڈی کی ڈگری موصول ہونے پر مسرت کا اظہار کیا
اس کی وجہ سے درجہ حرارت میں کمی بھی واقع ہو سکتی ہے۔
مزید اس تعلق سے محکمہ موسمیات کا کہنا ہے کہ تیز بارش ہونے کے باوجود فضائی آلودگی میں کسی طرح کی کوئی کمی واقع نہیں ہوئی ہے۔ فضا ہنوز آلودہ ہے۔
اترپردیش پالوشن کنٹرول بورڈ کے مطابق اتوار کے دن نوئیڈا کا اے کیو آئی نہایت ہی ناقص قسم کے ساتھ 364 اور گریٹر نوئیڈا میں 348 ریکارڈ کیا گیا۔
