بجنور: کسانوں کی جانب سے برازیل کے صدر کا پتلا نذرآتش

اترپردیش کے ضلع بجنور میں آل انڈیا کسان مہا سنگھ کے سیکڑوں کارکنان نے برازیل کے صدر کے خلاف شدید احتجاج کرتے ہوئے ان کا پتلا نذرآتش کیا۔

واضح رہے کہ ملک کے 71ویں یوم جمہوریہ کے موقع پر برازیل کے صدر بولسونارو کو بھارت کے مہمان خصوصی کے طور پر مدعو کیا گیا تھا۔

اور اس نسبت سے ملک بھر کے گنا کسان اور شکر ملوں کے ملازمین نے اپنی ناراضگی کا اظہار کیا تھا اس تعلق سے ضلع بجنور کے سیوہارہ گاؤں میں بھی برازیلین صدر بولسونارو کی آمد کے خلاف نعرے بازی کرتے ہوئے ان کا پتلا نذر آتش کیا گیا۔

واضح رہے کہ ملک کے گنا کسانوں کا کہنا ہے کہ برازیل اپنے ملک کی تیار کردہ شکر بھارت کو برآمد کرنا چاہتا ہے اور اگر ایسا ہوتا ہے تو ملک کے گنا کسانوں اور شوگر ملوں پر کافی مضر اثرات مرتب ہوں گے۔