جنپد کے نواب گنج کی چیئرپرسن شہلا طاہر نے اپنا ایک ویڈیو وائرل کیا ہے جس میں وہ ایس ڈی ایم وید پرکاش مشر پر الزام عائد کر رہی ہیں کہ ایس ڈی ایم اپنے عہدے کا غلط استعمال کر رہے ہیں۔ انہوں نے ویڈیو میں کہا کہ وہ انہیں نفسیاتی طور پر ہراساں کر رہے ہیں اور ان کی وجہ سے وہ ذہنی طور پر بے انتہا متاثر ہیں۔
انہوں نے ایس ڈی ایم پر الزام عائد کرتے ہوئے کہا کہ میونسپل آفس میں وہ انہیں ہٹا کر چیئرپرسن کی کرسی پر بیٹھ جاتے ہیں اور الٹے سیدھے فیصلے لیتے رہتے ہیں۔ چیئرپرسن نے مزید کہا کہ ان سے صرف وہ نہیں بلکہ نواب گنج کی پوری عوام پریشان ہے۔ ایس ڈی ایم ان سے کہتے ہیں کہ وہ اپنے سامنے کسی خاتون کو بیٹھنے نہیں دیں گے۔
چیئرپرسن شہلا نے ریاست کے وزیر اعلی یوگی آدتیہ ناتھ سے درخواست کرتے ہوئے کہا کہ وزیر اعلی اس معاملے میں نوٹس لیں اور افسر کے خلاف سخت کارروائی کی جائے۔
ویڈیو وائرل ہونے کے بعد طرح طرح کی قیاس آرائیاں کی جا رہی ہیں۔
ایس ڈی ایم وید پرکاش مشرا نے چیئر پرسن کی جانب سے عائد کئے گئے الزامات کو بے بنیاد قرار دیا ہے۔ ساتھ ہی انہوں نے کہا کہ چیئرپرسن ان کے اوپر دباؤ بنا کر فرضی طریقہ سے کام کروانا چاہتی ہیں۔ انہوں ںے کہا کہ چیئرپرسن مسلسل انہیں ذہنی طور پر ہراساں کر رہی ہیں جس کی شکایت وہ اعلی افسران سے کریں گے۔
