سہارنپور کے ناگل علاقہ میں ایک خاتون کے ساتھ تیزاب کے حملے کی کوشش کی گئی۔ اطلاعات کے مطابق تیزاب گرِنے سے خاتون شدید طورپر جھلس گئی۔
بتایا جا رہا ہے کہ لڑکی ناگل میں واقع بیوٹی پارلر سے اپنے بھائی کے ساتھ بذریعہ بائک گھر لوٹ رہی تھی، جیسے ہی ان کی بائک ستسنگ بھون کے قریب پہنچی تو پیچھے سے آئے بائک سوار دونوجوانوں نے لڑکی پر تیزاب پھینک دیا۔
موقع واردات پر موجود عینی شاہدین نے بتایا کہ ' تیزاب گرِتے ہی لڑکی تڑپ اٹھی، واقعہ کے فوراً بعد لڑکی کے بھائی نے بائک روکی اس سے قبل کہ وہ کچھ سمجھ پاتا ملزم نوجوان بائک سے فرار ہوگئے، بھائی فوری طورپر بہن کو لے کر دیوبند کے سرکاری ہسپتال پہنچا' ۔
واقعہ کی اطلاع ملتے ہی ضلع پولیس میں کھلبلی مچ گئی، آناً فاناً ایس ایس پی دنیش کمار بھی دیوبند ہسپتال پہنچے اور پورے واقعے کی معلومات حاصل کی۔
لڑکی کے بھائی جاوید نے بتایا کہ 'میں ناگل سے اپنی بہن کو لے کر اپنےگاؤں جارہاتھا، جیسے ہی ہم راستہ میں آرتی نامی پیٹرو ل پمپ کے پاس پہنچے تو اتنے میں
مزید پڑھیں : گالی دینے پر ایک شخص کا بہیمانہ قتل، ملزمان گرفتار
پیچھے سے آئے مسلح بائک سوار دو نوجوانوں نے میری بہن کے اوپر تیزابی حملہ کردیا'۔
جاوید نے بتایا کہ پہلے تو وہ کچھ سمجھ ہی نہیں پایا لیکن جب اچانک بہن جلن سے تڑپ اٹھی اور وہ کچھ سمجھ پاتا اس وقت تک نوجوان بائک سے فرار ہوگئے۔ آناً فاناً بہن کو ہسپتال میں داخل کرایا۔
جاوید نے بتایاکہ مقامی پولیس اسٹیشن میں شکایت درج کی گئی ہے، انہیں کسی پر شک نہیں ہے۔
انہوں نے پولیس سے غیر جانبدارانہ کارروائی کرنے کی مانگ کرتے ہوئے ملزموں کو فوری گرفتار کرکے سخت سزا دینے کا مطالبہ کیا۔
ایس ایس پی دنیش کمار نے کہا کہ 'بیس برس کی لڑکی ناگل سے دکان بند کر کے دیر شام اپنے بھائی کے ساتھ واپس اپنے گھر جارہی تھی، جس پر بائک سوار ہیلمٹ لگائے ہوئے نوجوانوں نے ایسیڈ اٹیک کیا ہے'۔
ملزمین کو پکڑنے کے لئے پولیس کی الگ الگ ٹیمیں تشکیل دی گئی ہیں، جو ان کی تلاش میں لگی ہوئی ہیں۔
دنیش کمار نے کہا کہ جلدی ہی ملزمین کو گرفتار کرکے واقعہ کی تفتیش کی جائے گی۔
