اسدالدین اویسی 9 تاریخ کو بارہ بنکی کا دورہ کریں گے

اترپردیش میں آئندہ ہونے والے اسمبلی انتخابات کے پیش نظر اے آئی ایم آئی ایم کے صدر اسدالدین اویسی 9 تاریخ کو ضلع بارہ بنکی کا دورہ کریں گے۔

اتر پردیش کے ضلع بارہ بنکی میں 9 ستمبر کو ہونے والے اے آئی ایم آئی ایم کے صدر اسدالدین اویسی کے دورے سے قبل یوپی کی سیاست میں افراتفری کا ماحول ہے۔ اس تعلق سے آج مجلس اتحاد المسلمین کے رہنما نے دعویٰ کیا کہ 9 ستمبر کو بارہ بنکی میں اویسی کا تاریخی پروگرام ہوگا۔

اطلاعات کے مطابق اویسی کا ضلع میں پروگرام تقریباً دو ہفتے پہلے شہر کے محلہ پیر بٹاون میں واقع فضل الرحمان پارک میں طے ہوا تھا. لیکن انتظامیہ کی جانب سے اجازت نہیں ملنے کی وجہ سے یہ پروگرام اب شہر کے چندنا محلہ میں واقع ایک ذاتی میدان پر ہوگا۔

پروگرام کے لئے اجازت نہیں ملنے سے ضلع کے اے آئی ایم آئی ایم کے کارکنان کو مخالفین کی سازش محسوس ہورہی ہے، پارٹی کے کارگزار ضلع صدر فروخ مختار کا کہنا ہے کہ جس طرح سے ایودھیا اور سلطانپور میں اویسی کے پروگرام میں بھیڑ نے شرکت کی ہے، اس سے ان کے مخالفین خاص کر کے سماجوادی پارٹی کو اپنی زمین کھسکتی نظر آرہی ہے، اس لئے پروگرام کو خراب کرنے کی سازش کی جارہی ہے۔