علی گڑھ مسلم یونیورسٹی (اے ایم یو) کے جواہر لعل نہرو میڈیکل کالج (جے این ایم سی) کے ڈاکٹر ضیاءالدین احمد ڈینٹل کالج (زیڈ اے ڈی سی) کو حال ہی میں جاری "انڈیا ٹو ڈے رینکنگ-2022" میں ملنے والی بالترتیب 17 ویں اور 10 ویں رینک نے اس بات کی شاہد ہے کہ طبی تعلیم اور صحت خدمات کو وسعت دینے میں کسی قسم کی وبا اور نہ ہی تالا بندی کمزور کرسکی ہے۔ علیگڑھ مسلم یونیورسٹی کے میڈیکل اور ڈینٹل کالج دونوں "انڈیا ٹوڈے رینکنگ2021" کی درجہ بندی سے اوپر آگئے ہیں۔ جے این ایم سی گزشتہ سال یعنی 2021 میں 18 ویں پوزیشن پر تھا لیکن اس بار 17 ویں نمبر پر اور زیڈ اے ڈی سی پچھلے سال 11 ویں پوزیشن پر تھا لیکن اس بار 10 ویں مقام پر پہنچ گیا ہے۔
اے ایم یو کے وائس چانسلر پروفیسر طارق منصور نے اس سے متعلق کہا 'ہمارے ڈاکٹر دنیا کو درپیش صحت کے سب سے بڑے بحران کووڈ ۔19 سے نمٹنے میں اہم کردار ادا کررہے ہیں۔ اترپردیش اور آس پاس کی ریاستوں کے لوگ کفایتی علاج کے لئے اے ایم یو اسپتال میں علاج کے لیے آتے ہیں۔ جے این ایم سی اور زیڈ اے ڈی سی ملک کے عمدہ ترین اسپتالوں میں سے ایک ہیں"۔
پروفیسر راکیش بھارگو (ڈین فیکلٹی آف میڈیسن) نے کہا کہ جے این ایم سی اور زیڈ اے ڈی کو بنیادی طور پر معیاری ڈاکٹر پیدا کرنے کے لیے جانا جاتا ہے۔ پرنسپل، جے این ایم سی پروفیسر شاہد علی صدیقی نے کہا "مشینوں سے لے کر میڈیکل پروٹوکول تک اور خاص طور سے تحقیقی دلچسپیوں کو آگے بڑھانے کے لیے جے این ایم سی ایک ممتاز ادادہ ہے"۔
پروفیسر راجندر کمار تیاری (پرنسپل، زیڈ اے ڈی سی) نے کہا "یہ رینکنگ بتاتی ہے کہ زید اے ڈی سی پیشہ ورانہ تعلیم وتربیت فراہم کرتا ہے اور معیانی تشخیص اور آزاد سوچ کی حوصلہ افزائی کرتا ہے"۔
