کووڈ-19 کے مریضوں کی تعداد بڑھنے کے ساتھ ہی ہسپتالوں میں وینٹی لیٹرز کی ضرورت بڑھ گئی ہے ایسے مشکل وقت میں دو تنظیموں نے علی گڑھ مسلم یونیورسٹی کے جواہر لعل نہرو میڈیکل کالج و ہسپتال کے لئے 6 وینٹی لیٹر عطیہ میں پیش کئے ہیں۔
علی گڑھ کیئر، ہاؤسٹن، امریکہ نے پانچ اور اے ایم یو المنائی ایسوسی ایشن ریاض، سعودی عرب نے ایک وینٹی لیٹر عطیہ میں پیش کیا ہے۔
وائس چانسلر پروفیسر طارق منصور نے اے ایم یو المنی تنظیموں کے ذریعے ان عطیات کا خیر مقدم کرتے ہوئے کہا ہے کہ اس سے جے این میڈیکل کالج میں صحت نظام کو مزید بہتر بنانے میں بہت مدد ملے گی۔ انہوں نے کہا کہ اے ایم یو کے ابنائے قدیم وقتا فوقتا اپنی مادر علمی کے تعاون کے لئے آگے آتے رہے ہیں جو بے حد قابل ستائش ہے۔
جواہر لعل نہرو میڈیکل کالج کے پرنسپل اور ہسپتال کے سی ایم ایس پروفیسر شاہد علی صدیقی نے محترمہ ثمینہ قدوائی (سیکرٹری علی گڑھ کیئر) اور انجینیئر سید محمد مطیب (صدر، اے ایم یو المنائی ایسوسی ایشن، ریاض) کا اس کار خیر کے لئے شکریہ ادا کرتے ہوئے کہا کہ آئی سی یو میں یہ وینٹی لیٹر کار آمد ہوں گے اور علاج میں سہولت ہوگی۔
