ریاست اتر پردیش کے سہارنپور میں واقع بہٹ علاقہ کے تھانہ مرزاپور میں ایک اسٹون کریشر پر مزدوری کے پیسے مانگنے گئے مزدور کو مالک کے ایک رشتہ دار نے گولی مار کر زخمی کردیا۔
اس واقعہ کے بعد علاقہ میں سنسنی پھیل گئی، اطلاع ملنے پر گاؤں کے باشندے اور پولیس موقع واردات پر پہنچ کر زخمی مزدور کو ضلع اسپتال روانہ کیا۔
موصولہ اطلاعات کے مطابق گاؤں مگن پورہ کے پاس شوم اسٹون کریشر پر گاؤں کا ہی رہنے والا مہتاب ولد یاسین اپنی مزدوری کے پیسے مانگنے کے لئے اسٹون کریشر پر پہنچا تھا، پیسے کے لین دین کو لیکر ہوئی کہا سنی کے بعد کریشر کے مالک نیرج کے ایک رشتہ دار نے مزدور پر فائرنگ کردی، جس کے سبب مزدور مہتاب شدید طورپر زخمی ہوگیا۔
جیسے ہی اس واقعہ کی اطلاع گاؤں والوں کو ملی افراتفری پھیل گئی اور بڑی تعداد میں گاؤں والے موقع پر پہنچے، جہاں اطلاع ملتے ہی مرزاپور تھانہ انچارج اجے کمار، سی او بہٹ فورس کے ہمراہ موقع پر پہنچ کر زخمی کو ہسپتال پہنچایا، جہاں اس کی نازک حالت کو دیکھتے ہوئے اسے ہائر سنٹر ریفرکر دیا گیا۔
واقعہ کے بعد سے گاؤں والوں میں کریشر مالک کے رویہ کو لیکر زبردست ناراضگی ہے۔
یہ بھی پڑھیں: سہارنپور: دو بائیک چور گرفتار، دس موٹر سائیکلیں برآمد
گاؤں والوں کا مطالبہ ہے کہ حملہ آور کو فوراً گرفتار کیا جائے اور مزدور کی مزدوری دلائی جائے۔
ادھر علاقہ کے رکن اسمبلی نریش سینی نے ہسپتال پہنچ کر زخمی سے ملاقات کی اور پولیس سے ملزم کے خلاف سخت کارروائی کا مطالبہ کیا۔
