فلاحی تنظیموں نے اے ایم یو 29 آکسیجن کنسنٹریٹرعطیہ کئے

کووڈ 19 کے مریضوں کی مدد کے لئے مختلف فلاحی تنظیموں اور افراد نے علی گڑھ مسلم یونیورسٹی (اے ایم یو) کے جواہر لال نہرو میڈیکل کالج کو کل 29 آکسیجن کنسنٹریٹر عطیہ میں دیے ہیں۔

علی گڑھ مسلم یونیورسٹی جواہر لعل نہرو میڈیکل کالج کے پرنسپل اور سی ایم ایس پروفیسر شاہد علی صدیقی نے بتایا کہ شہر کے نامور اور صنعتکار اور لنک لاکس کے سی ایم ڈی محمد ظفر عالم نے 10 آکسیجن کنسنٹریٹر بطور عطیہ دیا ہے۔ ظفر عالم کے نمائندے مظفر اقبال نے پروفیسر صدیقی کو یہ آکسیجن کنسنٹریٹر پیش کئے۔ اس موقع پر کمیونٹی میڈیسن شعبہ کی ایسوسی ایٹ پروفیسر ڈاکٹر سائرہ مہناز بھی موجود تھیں۔

اسی طرح امریکہ کی علیکس کیئر نے 9 ایچ ایم کے آکسیجن کنسنٹریٹر عطیہ دئیے۔ علیکس کیئر کے عہدیداران ڈاکٹر ثمینہ سلیم اور ڈاکٹر شاہد حسین نے اس عطیہ میں بنیادی کردار ادا کیا۔

اس کے علاوہ ایچ ایم ایکسپورٹس، نئی دہلی کی جانب سے ندیم حسین اور فیضان مصطفی اور ایجوکیشنل اینڈ ویلفیئر سوسائٹی کی جانب سے نثار احمد وانی نے نوئیڈا کے دانش کے ذریعے پانچ پانچ آکسیجن کنسنٹریٹر کا عطیہ میڈیکل کالج کو دیا ہے۔ فیضان مصطفی ایجوکیشن ویلفیئر سوسائٹی نے ایک ہزار آر این 95 ماسک بھی بطور عطیہ دئیے ہیں۔

پروفیسر شاہد علی صدیقی نے کہا کہ جواہر لال نہرو میڈیکل کالج میں آکسیجن کنسنٹریٹر کی مجموعی تعداد 38 ہوگئی ہے۔ اس سے پہلے 9 اکسیجن کنسنٹریٹر تھے۔