ریاست اترپردیش کے ضلع باندہ کے اترا علاقے میں باراتیوں سے بھری ایک بس پلٹ گئی، جس سے اس میں سوار 11 افراد شدید طور پر زخمی ہوگئے۔
پولیس کے ترجمان نے بتایا کہ ضلع مہوبہ کے گیا پرساد کے بیٹے پرمیشوری دیال کی بارات کھمورا گاؤں جارہی تھی، راستے میں کھمورا گاؤں کے نزدیک اچانک ڈرائیور نے بس پر اپنا قابو کھو دیا اور بس پلٹ گئی، جس میں حادثے کی وجہ سے 11 باراتی زخمی ہوگئے۔
اطلاع ملتے ہی موقع پر پہنچی پولیس نے زخمیوں کو علاج کے لیے ہسپتال میں داخل کرایا۔
پولیس نے بتایا کہ چھ باراتیوں کو معمولی چوٹیں آئی ہیں جن کا علاج کرانے کےبعد انہیں گھر بھیج دیا گیا، جبکہ شدید طور زخمی گیا پرجا پتی کو کانپور ریفر کردیا گیا ہے۔
انہوں نے بتایا کہ دیگر چار زخمیوں کو مقامی ہسپتال میں داخل کرادیا گیا ہے، خیال کیا جارہا ہے کہ حادثہ رات تقریباً 11 بجے کا ہے۔
