مرکز کے زیر انتظام جموں و کشمیر کے ادھمپور میں مزدور دستکاری یونین کی جانب سے حکومت کے خلاف مظاہرے کیے گئے۔
مزدور دستکاری یونین نے بچوں کو سکالرشپ کی سہولت فراہم کرنے، بیٹیوں کی شادی کے لیے 25 ہزار روپے دینے اور دیگر زیر التوا مطالبات کو لے کر حکومت کے خلاف مظاہرہ کیا۔
ان کا کہنا ہے کہ وہ سرکاری سہولیات کا مطالبہ گذشتہ کئی سالوں سے کر رہے ہیں لیکن کوئی بھی ان کے مسئلے پر توجہ نہیں دے رہا ہے۔
یونین کے ضلع سربراہ درشن کمار نے بتایا کہ لیبر کارڈ ملنے کے بعد ان کے بچے لیبر ڈپارٹمنٹ سے اسکالرشپ حاصل کرتے تھے لیکن گذشتہ کئی سالوں سے بہت سارے بچوں کو یہ اسکالرشپ نہیں مل رہی ہے۔ اس کی وجہ سے بچوں کو تعلیم جاری رکھنے میں مشکلات کا سامنا کرنا پڑ رہا ہے۔
انہوں نے کہا کہ محکمہ مزدور کی جانب سے مزدوروں کو بیٹی کی شادی کے لیے 25000 روپے ملتے تھے لیکن یہ 2016 سے بند کردیا گیا۔ متعدد بار اس سہولت کو شروع کرنے کا مطالبہ حکومت کے سامنے رکھا گیا لیکن یقین دہائی کے علاوہ کچھ نہیں ملا۔
درشن کمار نے کہا کہ اس کے علاوہ مزدوروں کو آج تک پنشن کی سہولت نہیں مل سکی ہے۔ ملک کی متعدد ریاستوں میں 60 سال سے زیادہ عمر کے مزدوروں کو پنشن دی جارہی ہے لیکن جموں و کشمیر میں مزدوروں کو یہ سہولت نہیں دی جا رہی ہے۔ مزدوروں کو کم از کم تین ہزار روپے پنشن ملنی چاہئے۔ مہنگائی کی وجہ سے غریب مزدور سب سے زیادہ نقصان اٹھا رہے ہیں۔
یہ بھی پڑھیں: مغوی سی آر پی ایف کمانڈو کے افراد خاندان کا جموں میں احتجاجی مظاہرہ
انہوں نے کہا کہ مہنگائی کو کم کرنے کے لئے حکومت کچھ نہیں کررہی ہے۔ حکومت کی طرف سے مطالبات پورے نہ ہونے کی وجہ سے انہیں بار بار مظاہرہ کرنا پڑ رہا ہے۔
