جموں و کشمیر کے ضلع اودھمپور کے بھارتیہ جنتا یووا مورچہ (بی جے وائی ایم) کے کارکنوں نے فائر بریگیڈ کی حالیہ سلیکشن لسٹ کے خلاف احتجاجی مظاہرہ کیا اور جلد ہی اسے منسوخ کرنے کا مطالبہ کیا۔
بی جے وائی ایم کے ضلع صدر سوشانت گپتا کی سربراہی میں مظاہرے کے دوران فائر بریگیڈ سروس کی بھرتیوں میں بڑی رکاوٹوں اور دھاندلی کا الزام لگایا گیا۔
وینس چوک کے باہر ہوئے مظاہرے کے دوران بھرتی میں ہوئی بدعنوانی میں شامل لوگوں کے خلاف سخت کاروائی کا مطالبہ کیا گیا۔
اس موقع پر بی جے وائی ایم کے ضلع صدر نے خطاب کرتے ہوئے کہا کہ یہ انتہائی بدقسمتی اور افسوسناک بات ہے کہ بھرتی کے عمل میں کس طرح بدعنوانی کی جاتی ہے، جس کی وجہ سے مستحق نوجوان نوکریاں حاصل کرنے کے حق سے محروم رہ جاتے ہیں۔
انہوں نے متنبہ کیا کہ اگر فائر بریگیڈ کی نام نہاد بھرتیوں کی فہرست کو جلد ہی واپس نہیں لیا گیا یا منسوخ نہیں کیا گیا تو بی جے وائی ایم اس ناانصافی کے خلاف ایک وسیع احتجاج شروع کرے گا۔
انہوں نے کہا کہ اس بھرتی گھوٹالے کی اعلیٰ سطحی تحقیقات ہونی چاہئے اور اس میں ملوث تمام افراد کو برخاست اور سزا دی جانی چاہئے تاکہ مستقبل میں منصفانہ بھرتیوں کے لئے ایک مضبوط مثال قائم کی جاسکے۔
واضح ہو کہ فائر بریگیڈ کے ذریعہ جاری کردہ بھرتی کی فہرست میں بھاری دھاندلی اور بدعنوانی کا الزام لگایا گیا ہے، الزام میں کہا گیا ہے کہ اہل نوجوانوں کا نام فہرست سے ہٹا دیا گیا ہے جبکہ کم قابلیت والوں کا انتخاب کیا گیا ہے۔
