ٹالی ووڈ کی مشہور اداکارہ وجئے شانتی نے گذشتہ روز وزیر داخلہ امیت شاہ سے ملاقات کرکے بی جے پی میں شمولیت اختیار کرلی جبکہ اس موقع پر، مرکزی مملکتی وزیر داخلہ جی کشن ریڈی، تلنگانہ بی جے پی صدر بنڈی سنجے و دیگر موجود تھے۔
وجئے شانتی کو کانگریس انتخابی مہم کمیٹی کا صدرنشین مقرر کیا گیا تھا۔ انہوں نے کچھ روز قبل کانگریس پارٹی کی ابتدائی رکنیت سے استعفی دے دیا تھا۔
2019 پارلیمنٹ انتخابات کے بعد وجئے شانتی نے کانگریس سے دوری اختیار کرلی تھی۔ انہیں تشہیری کمیٹی کا صدرنشین مقرر کیا گیا تھا تاہم انہوں نے گذشتہ کچھ روز قبل ہوئے دوباک اسمبلی انتخابات کی تشہیری مہم سے بھی خود کو دور رکھا تھا۔ بالآخر انہوں نے کشن ریڈی اور بنڈی سنجے کی دعوت کو قبول کرکے بی جے پی میں دوبارہ شام ہوگئیں۔
54 سالہ وجئے شانتی 1997 میں بی جے پی سے ہی اپنے سیاسی کیریئر کی شروعات کی تھی تاہم انہوں نے تلنگانہ تحریک کے دوران ٹی آر ایس میں شمولیت اختیار کرلی۔ 2009 میں ٹی آر ایس کے ٹکٹ پر وجئے شانتی نے لوک سبھا انتخابات میں جیت حاصل کی اور 2014 میں آندھراپردیش کی تقسیم سے عین قبل انہوں نے کانگریس میں شمولیت اختیار کرلی تھی۔
2023 میں منعقد ہونے والے تلنگانہ عام انتخابات کےلیے بی جے پی کی تیاریاں جاری ہے۔ بی جے پی نے وجئے شانتی کو 2023 کے انتخابات میں اسٹار کیمپینر کے طور پر اتارنے کا فیصلہ کیا ہے۔
واضح رہے کہ قبل ازیں کانگریس کی انتخابی مہم میں حصہ لیتے ہوئے وجئے شانتی نے وزیراعظم نریندر مودی کو ’دہشت گرد اور ڈکٹیٹر‘ قرار دیا تھا۔
