تلنگانہ کے ریاستی وزیر صحت ای راجندر نے بتایا کہ ریاست میں ٹیکہ کاری کی مہم کامیابی کے ساتھ جاری ہے جبکہ 6 فروری سے پولیس اور سیکوریٹی فورسز کے علاوہ مختلف سرکاری محکموں کے ملازمین کو ٹیکہ لگایا جا رہا ہے۔
انہوں نے بتایا کہ ریاست میں کورونا کیسز میں نمایاں کمی کے بعد کچھ ہسپتالوں کو کووڈ فری بنایا جارہا ہے۔ قبل ازیں ریاست کے تمام ہسپتالوں میں کورونا مریضوں کےلیے خصوصی انتظامات کئے گئے تھے لیکن کیسز کی کمی کے بعد کچھ ہسپتالوں کو کوویڈ فری بنایا جارہا ہے۔
ای راجندر نے کہا کہ ’جن کوویڈ مریضوں کو پھیپھڑوں سے متعلق مسائل ہوں گے، ان کا علاج چیسٹ ہسپتال میں کیا جائے گا۔ ملٹی آرگن مسائل والے مریضوں کا علاج گاندھی ہسپتال میں اور عام علامات والے کووڈ مریضوں کا ٹمس ہسپتال میں علاج کیا جائے گا۔
واضح رہے کہ ریاست میں اب تک سرکاری اور نجی ہسپتالوں کے بشمول ایک لاکھ 93 ہزار 485 افراد کو کووڈ کا ٹیکہ لگایا گیا ہے۔
