تلنگانہ کے وزیر کے ٹی آر نے کہا کہ دہلی میں اس وقت خطرناک سردی پڑ رہی ہے، جہاں کسان گزشتہ 13 دنوں سے اپنے حق کے لیے لڑ رہے ہیں۔ انہوں نے کہا کہ حکومت کا زرعی قوانین کسانوں کے خلاف ہے۔ حکومت کو چاہئے کہ وہ اس کسان مخالف زرعی قوانین کو فوری طور پر واپس لے۔
تلنگانہ کے آئی ٹی اور بلدیاتی وزیر کے تارک راما راؤ نے آج بھارت بند کے موقع پر ضلع رنگا ریڈی کے شاد نگر میں واقع بورگولہ گیٹ سے متصل قومی شاہراہ پر دھرنا دیا اور کسانوں کے ساتھ انصاف کرنے کا مرکزی حکومت سے مطالبہ کیا۔
انہوں نے کہا کہ مرکزی حکومت کسانوں کو کم از کم امدادی قیمت دینے کے لیے تیار نہیں ہے، مرکز کارپوریٹ اداروں کے اشاروں پر کام کرتے ہوئے کسانوں کے ساتھ نہ انصافی کررہی ہے۔
انہوں نے کہا کہ وزیر اعلی کے چندر شیکھر راؤ کی ہدایت پر آج پورے تلنگانہ میں ٹی آر ایس پارٹی کے اقلیتی رہنما ایڈوکیٹ افتخار الدین اور اسلم عبدالرحمن اور کارکنان تمام قومی شاہراہوں پر احتجاج کر رہے ہیں۔
حیدرآباد کے تاریخی چارمینار کے دامن میں ٹی آر ایس کے رہنماؤں نے دھرنا منعقد کیا۔ اس موقع پر حلقہ چارمینار انچارج محمد صلاح الدین لودھی نے کہا کہ مرکزی حکومت نے کسانوں کے خلاف جو قانون منظور کیا ہے، اس کو مسترد کرے۔
مزید پڑھیں:
بھارت بند کے دوران ملک بھر میں مظاہرے
ساتھ ہی انہوں نے کہا کہ ریاستی حکومت نے کسانوں کی فلاح و بہبود کے لئے جو اسکیم چلا رہی ہے، انہیں اس طرح مرکزی حکومت بھی کسانوں کی فلاح و بہبود کے لئے کام کرنے کی ضرورت ہے۔ پرانے شہر حیدرآباد کے کئی علاقوں میں بھارت بند کا اثر نہیں دکھا۔ جبکہ نئے شہر حیدرآباد کے کئی مقامات بند نظر آئے۔
