تلنگانہ وزیر آئی ٹی کےتارک راما راو نے دعوی کیا کہ تلنگانہ میں وزیراعلی کے سی آر کا مقابلہ کرنے کےلیے کوئی سیاسی طاقت موجود نہیں ہے۔
سنگارینی بی ایم ایس صدر کے ملیا کی ٹی آر ایس میں شمولیت کے موقع پر انہوں نے کہا کہ تلنگانہ میں پدیاترا کا سیزن چلنے والا ہے۔ مختلف رہنما ایک دوسرے پر سبقت لے جانے کی کوشش کررہے ہیں۔ انہوں نے کہا کہ جو پدیاترا کرنا چاہتے ہیں کریں اس سے صحت میں بہتری برقرار رہے گی۔
کے ٹی آر نے تلنگانہ بی جے پی صدر بنڈی سنجے کو مشورہ دیا کہ وہ ہر گاؤں کا جائزہ لیں اور دیہی علاقے کس طرح ترقی کررہے ہیں اس پر غور کریں۔ ہر گاؤں میں جھاڑ اور پھول آپ کا خیرمقدم کریں گے۔ ایسی ترقی بی جے پی ریاستوں میں کہیں نظر نہیں آئےگی۔
ریاست میں کسی آبپاشی پراجکٹ کو مرکز نے قومی پراجکٹ کا درجہ نہیں دیا ۔ انہوں نے اپوزیشن رہنماوں پر بے لگام زبان میں بات کرنے کا الزام عائد کیا اور کہا کہ ایک رہنما اقتدار کو چھین لینے کا اعلان کررہے ہیں اور چند کے سی آر پر تنقید کرکے سستی شہرت حاصل کرنے کی کوشش کررہے ہیں۔
