تلنگانہ کی وزیر تعلیم سبیتا اندرا ریڈی نے آج ایس ایس سی امتحانات کو ریاست بھر میں ملتوی کرنے کا اعلان کیا ہے۔
سبیتا اندرا ریڈی نے ایس ایس سی کے امتحانات کو ملتوی کرنے کے بعد کہا کہ ’وہ بہت جلد وزیراعلیٰ کے سی آر سے ایک فل پروف پلان کے ساتھ رجوع ہوں گی اور بہت جلد ریاست میں کب اور کیسے امتحانات منعقد ہوں گے اس بات کا فیصلہ کیا جائے گا۔
قبل ازیں تلنگانہ ہائی کورٹ نے گریٹر حیدرآباد علاقہ کو چھوڑ کر تلنگانہ بھر میں ایس ایس سی امتحان منعقد کرنے کا حکم دیا تھا جبکہ ہائی کورٹ نے حیدرآباد، سکندرآباد اور رنگاریڈی کی کوویڈ۔19 کے ہاٹ اسپاٹ کے طور پر نشاندہی کی تھی اور ان علاقوں میں امتحانات منعقد کرنے کی اجازت دینے سے انکار کردیا تھا۔
واضح رہے کہ قبل ازیں جاری شیڈول کے مطابق 8 جون سے ریاست بھر میں ایس ایس سی امتحانات کا آغاز ہونے والا تھا۔
یہاں یہ ذکر بھی بیجا نہ ہوگا کہ مارچ میں منعقدہ ایس ایس سی امتحانات کو کورونا وبا کے پیش نظر تلنگانہ ہائیکورٹ ملتوی کردیا تھا جبکہ دو مضمون کے امتحانات منعقد ہوچکے تھے۔
