چیف سیکریٹری سومیش کمار نے آج مذکورہ حکومتوں کو مکتوب روانہ کرتے ہوئے تلنگانہ میں فصلیں کاٹنے اور رائس ملز میں کام کرنے کے لیے مزدوروں کو بھیجنے کی درخواست کی۔
انہوں نے لکھا کہ تلنگانہ میں دھان اور مکئ کی فصلیں تیار ہیں اور اب فصل کاٹنے کا موسم ہے لیکن کورونا وائرس کے باعث جاری لاک ڈاؤن کی وجہ سے کٹائی کےلیے مزدور نہیں ہیں جس کے باعث فصل کاٹنے کا کام رکا ہوا ہے۔
تلنگانہ حکومت نے چاروں ریاستوں کی حکومتوں کو مزدور کےلیے خصوصی بسوں کا انتظام کرنے اور سفر کے دوران بسوں میں سماجی دوری برقرار رکھنے کے علاوہ ان کی صحت کے تحفظ کےلیے مکمل اقدامات کئے جانے کا تیقن دیا اور بس میں سوار ہونے سے قبل تمام افراد کی طبی جانچ کو یقینی بنایا جائے گا۔
تلنگانہ کے کھیتوں میں فصل کاٹنے اور رائس ملز میں تقریباً 20 ہزار مزدور کام کرتے ہیں جن کا تعلق بہار، چھتیس گڑھ، اوڈیشہ، جھارکھنڈ سے ہے ہولی کے تہوار پر اپنے گاؤں جانے والے یہ مزدور لاک ڈاؤن کی وجہ سے اپنے آبائی مقامات پر پھنسے ہیں حکومت انہیں لانے کیلئے اقدامات کر رہی ہے۔
