وزیر صحت ایٹلا راجیندر نے ایک پریس کانفرنس سے خطاب کرتے ہوئے پھر ایک بار کورونا وائرس معاملات کو مرکز نظام الدین سے جوڑا۔
انہوں نے کہا کہ ریاست میں کورونا وائرس کے 90 فیصد معاملات کا تعلق دہلی کے نظام الدین مرکز سے ہے۔
وزیر صحت نے مزید کہا کہ تلنگانہ حکومت کی جانب سے کئے گئے سخت اقدامات کی وجہ سے ریاست میں وائرس کی صورتحال قابو میں ہے۔ انہوں نے آئندہ چار دنوں کے دوران کیسز میں مزید کمی کی امید ظاہر کی۔
انہوں نے کہا کہ ریاستی حکومتنے دہلی کے نظام الدین مرکز اجتماع میں شرکت کرنے والے افراد کی فوری طور پر نشاندہی کرتے ہوئے انہیں، ان کے رشتہ داروں اور ملاقاتیوں کو فوری طور پر کورنٹائن کردیا گیا جس کی وجہ سے وائرس کو مزید پھیلنے سے روکا جاسکا۔
تلنگانہ میں اب تک اس وبا سے 464 صحتیاب ہوچکے ہیں اور 28 افراد کی موت ہوچکی ہے جبکہ 552 کورونا مریضوں کا ہسپتال میں علاج کیا جارہا ہے۔
واضح رہے کہ بعض میڈیا کی جانب سے کورونا وائرس کو مسلمانوں سے جوڑنے کے بعد یہ معاملہ انتہائی حساس ہوگیا ہے اور ملک بھر میں مسلمانوں کے خلاف نفرت انگیز واقعات سامنے آئے ہیں، ان سب کے باوجود مرکزی اور ریاستی حکومتوں کی جانب سے کئی بار کورونا وائرس کو ایک خاص طبقہ سے جوڑکر دیکھا جارہا ہے جبکہ وزیراعظم نریندر مودی نے ایک ٹوئٹ کے ذریعہ واضح کیا ہے کہ یہ وبا کسی مذہب یا ذات کےلیے مخصوص نہیں ہے۔
