دہلی سِوِل ڈیفینس اہلکار کے ساتھ جنسی زیادتی اور قتل کے بعد انہیں انصاف دلانے کے لیے ملک کے مختلف حصوں میں احتجاج اور کینڈل مارچ نکالا گیا۔ اس سلسلے کی ایک کڑی ریاست تلنگانہ کے دارالحکومت حیدرآباد میں بھی نظر آئی جہاں تاریخی چار مینار کے دامن میں مختلف تنظیموں کی جانب سے احتجاج کرکے قاتلوں کو جلد از جلد گرفتار کرکے انہیں سزا دینے کا مطالبہ کیا گیا۔
واضح رہے کہ دہلی سَنگم وِہار کی خاتون اہلکار کے ساتھ جنسی زیادتی کے بعد قتل کردیا گیا تھا جس کے بعد ملک بھر میں ناراضگی کی لہر ہے۔
اس تعلق سے سماجی کارکن خالدہ پروین نے حکومت سے مطالبہ کیا کہ فوری طور پر متاثرہ کے اہل خانہ کو انصاف دلایا جائے۔
واضح رہے کہ متوفی خاتون دہلی پولیس میں کانسٹیبل کے عہدہ پر فائز تھیں اور دہلی کے سنگم وہار میں رہتی تھیں۔ اسے ڈیوٹی جوائن کئے ابھی صرف چار ماہ ہی مکمل ہوئے تھے۔27 اگست کو جب وہ گھر نہیں لوٹی تو گھر والوں نے تلاش کرنا شروع کیا لیکن کوئی سراغ نہیں ملا اور بعد میں اس کی لاش برآمد ہوئی جس پر چاقو حملہ کے 50 سے زائد نشانات نظر آئے اور گلا بھی کٹا ہوا تھا۔
سماجی کارکن خالدہ پروین نے کہا کہ رابعہ کے قتل کی سی بی آئی جانچ ہو اور خاطیوں کو پھانسی کی سزا دی جانی چاہیے۔ چار مینار کے دامن میں اس کینڈل مارچ میں نوجوانوں اور خواتین نے بڑی تعداد میں شرکت کی۔
