حیدرآباد: آل انڈیا مجلس اتحاد المسلمین کے رکن اسمبلی اکبر الدین اویسی نے آج عاشورہ خانہ بی بی کا الاوہ دبیر پورہ کا دورہ کرتے ہوئے محرم کے انتظامات کا جائزہ لیا۔ انہوں نے علم بی بی پر ڈھٹی پیش کی اور تبرکات حاصل کئے۔ اکبر الدین اویسی کو الاوہ بی بی کے انتظامات سے واقف کرایا گیا ۔بعد ازاں میڈیا کے نمائندوں سے بات چیت کرتے ہوئے اکبر الدین اویسی نے کہا کہ ہر سال کی طرح اس سال بھی تمام عاشور خانوں میں نقائص سے پاک انتظامات کئے گئے ہیں۔ انہوں نے کہا کہ عاشور خانوں اور انجمنوں کے لئے وقف بورڈ نے 18 لاکھ روپئے جاری کئے جن کے ذریعہ سبیلوں اور دیگر سہولتوں کا اہتمام کیا گیا ہے۔
اکبر الدین اویسی نے کہا کہ علم بی بی کے مرکزی جلوس کے انتظامات کے سلسلہ میں تمام سرکاری محکمہ جات کو ہدایات جاری کی گئی ہیں۔ اکبر الدین اویسی نے کہا کہ حیدرآباد کا محرم اپنی تہذیب اور روایات کے سبب دنیا بھر میں شہرت رکھتا ہے۔ ملک کے مختلف حصوں سے بلا لحاظ مذہب و ملت عوام حیدرآباد پہنچ کر عقیدت و احترام سے جلوس میں شامل ہوتے ہیں۔ جلوس ہندو مسلم اتحاد کا عملی نمونہ ہے اور امام حسین سے عقیدت میں مسلمانوں کے ساتھ دیگر طبقات بھی برابر کے شریک ہیں۔
مزید پڑھیں: بی بی کے علم کے جلوس کی تاریخ
واضح رہے کہ حیدرآباد میں دس محرم الحرام عاشورہ کے دن حیدرآباد کے مشہور بی بی کے علم کےلئے حکومت کی جانب سے انتظامات اور فنڈز فراہم کیے جاتے ہیں۔ اس جلوس کو دیکھنے کے لئے بلا لحاظ مذہب و ملت افراد نہ صرف حیدرآباد بلکہ اطراف واکناف سے لوگ آتے ہیں۔
