آج دنیا نئی ٹکنالوجی کے دور میں ہے اورصحافت جسے جمہوریت کا چوتھا ستون کہا جاتا ہے‘ نئے آلات اور تکنیک سے لیس ہورہی ہے‘ ایسے میں اردو صحافیو ں اور میڈیا کے نمائندوں کو بھی نئے دور سے ہم آہنگ ہونا ضروری ہے‘دیکھا یہ جارہا ہے کہ ٹکنالوجی کی ترقی کے اس میدان میں اردو صحافت کونت نئے مسائل کا سامنا ہے۔اس لئے اگر ان کی شفافیت کے ساتھ تکنیکی، اخلاقی اور فنی تربیت ہو تو ان کی صلاحیتوں میں مزید نکھار پیدا ہوسکتا ہے۔
اس اہم ذمہ داری کو نبھانے تلنگانہ اردواکیڈیمی نے بھارت اور ریاست تلنگانہ کے اُردو صحافیوں / میڈیا کے نمائندوں کی تربیت کے لئے ایک پلیٹ فارم مہیا کرنے کا فیصلہ کیا اور اس ضمن میں محمد رحیم الدین انصاری صدرنشین تلنگانہ اردواکیڈیمی کی سرپرستی میں 13 جولائی تا 17 جولائی 2021 ء پانچ روزہ قومی آن لائن تربیتی ورکشاپ کا انعقاد عمل میں لایاجارہا ہے۔
اس پروگرام کا افتتاح 13 جولائی کو صبح 10:30بجے ہوگا۔اس تربیتی ورکشاپ کے لیے میڈیا انڈسٹری کے ماہرین کی خدمات حاصل کی جارہی ہیں جو اپنی فنی مہارت اور تجربوں کومقررہ آن لائن سیشن کے ذریعہ شیئر کریں گے۔
تلنگانہ اردواکیڈیمی کے صحافتی اعلامیہ میں کہا گیا ہے کہ اس تربیتی ورکشاپ میں داخلہ سے دلچسپی رکھنے والے صحافی اپنا نام درج کرواسکتے ہیں۔ اہل اور رجسٹرڈ امیدواروں کو پروگرام سے قبل مطلع کیا جائے گا۔ مزید معلومات کے لئے سیل فون نمبر 9948011372 اور 9700117738 پر ربط کیا جاسکتا ہے۔
یہ بھی پڑھیں:حیدرآباد: 66 برس کا پہلوان نوجوانوں کے لیے مشعل راہ
یواین آئی
