آندھرا پردیش میں ایک ہی دارالحکومت تحریک سے وابستہ ایک اور کسان کی دل کا دورہ پڑنے کی وجہ سے موت ہوگئی۔ لنگایاپیلم کے 46 سالہ کسان نماگڈا وینکٹ راؤ نے تیلگو دیشم دورحکومت میں اعلان کردہ نئے دارالحکومت امراوتی کی تعمیر کے لیے 1.25 ایکڑ اراضی دی تھی۔ تاہم جگن موہن ریڈی کے زیر قیادت وائی ایس آر کانگریس کے برسراقتدار آنے کے بعد ریاست میں ایک کے بجائے تین دارالحکومت کا اعلان کیا گیا جس کے خلاف امراوتی کے کسان احتجاج کر رہے ہیں۔ کسانوں کا مطالبہ ہے کہ ریاست میں ایک ہی دارالحکومت کے طور پر امراوتی کو برقرار رکھا جائے۔
این وینکٹ راؤ کے افراد خاندان کے مطابق 'وہ کچھ عرصے سے امراوتی میں رونما ہونے والی تبدیلیوں سے مایوس تھے۔'
احتجاجی کسانوں نے بتایا کہ 'وینکٹ راؤ جمعرات کو بھی تحریک میں شامل ہوئے تھے۔ تاہم رات میں دل کا دورہ پڑنے کی وجہ سے ان کا انتقال ہوگیا۔'
امراوتی کو ہی دارالحکومت کے طور پر برقرار رکھنے کے مطالبہ پر 29 دیہاتوں کے کسانوں کی جانب سے احتجاج کیا جارہا ہے۔
