دونوں تیلگو ریاستوں تلنگانہ اور آندھراپردیش کے بیشتر علاقوں میں درجہ حرارت 40 ڈگری درج کی جارہی ہے۔ماہ مارچ کے اختتام سے ہی درجہ حرارت میں بتدریج اضافہ ہوتا جارہا ہے۔
محکمہ موسمیات نے انتباہ دیا ہے کہ آئندہ دنوں کے دوران درجہ حرارت میں مزید اضافہ ہوگا۔رات کے درجہ حرارت میں بھی اضافہ ہورہا ہے۔محکمہ موسمیات کے مطابق درجہ حرارت معمول سے زائد ریکارڈ کیا گیا ہے۔ دونوں ریاستوں کے اضلاع کے علاوہ مختلف مقامات پر شدید گرمی کی لہر دیکھی جارہی ہے۔
گرمی سے بچنے کے لئے لوگ مختلف تدابیر اختیار کررہے ہیں۔دوپہر کے وقت سڑکوں پر ٹرافک میں کمی دیکھی جارہی ہے۔واٹر کولرس، ائیر کولرس کے علاوہ ٹھنڈی مشروبات کی فروخت میں بھی کافی اضافہ ہوگیا ہے۔
ڈاکٹروں نے چھوٹے بچوں اور ضعیف افراد کو مشورہ دیا ہے کہ وہ گھروں میں ہی رہیں۔عوام کا کہنا ہے کہ گذشتہ برسوں کے مقابلے اس مرتبہ گرمی کافی ہے۔صبح 9بجے سے ہی شدید گرمی کا آغاز ہورہا ہے جو دوپہر میں اپنے عروج پر دیکھی جارہی ہے۔ ٹھنڈی مشروبات کے ساتھ ساتھ او آر ایس کی پیکٹس و مشروبات کی فروخت بھی بڑھ گئی ہے۔ڈاکٹروں نے عوام کو مشورہ دیا ہے کہ وہ شدید دھوپ میں باہر نہ نکلیں۔
یو این آئی
