کووڈ 19 کی ایک مریضہ نے اسپتال کے باتھ روم میں پھانسی لگا کر خودکشی کر لی۔ یہ واقعہ تلنگانہ کے ضلع کھمم میں جمعرات کی شب پیش آیا۔
اس مریض کی شناخت ضلع محبوب آباد کے بدھارم گاؤں کی رہنے والی 65سالہ ماریماں کے طور پر کی گئی ہے۔ اس کو 2 ستمبر کو علاج کے لئے اسپتال میں داخل کروایا گیا تھا۔ وہ سانس لینے میں دشواری کی شکار تھی۔
اسپتال کے ذرائع نے کہا کہ وہ فکر مند تھی کہ آیا وہ روبہ صحت ہوگی یا نہیں۔ اس کو کووڈ 19سے متاثر ہونے پر گاؤں والوں کی جانب سے بے عزتی کا بھی خوف تھا۔ کھمم ٹاؤن پولیس نے اس سلسلہ میں ایک معاملہ درج کر کے جانچ شروع کر دی۔ اس واقعہ سے اسپتال کے کووڈ وارڈ میں زیرِعلاج مریضوں میں تشویش پیدا ہوگئی۔
