حیدرآباد: 119 رکنی تلنگانہ اسمبلی کے لیے پولنگ 30 نومبر کو ہوئی۔ نتیجہ 3 دسمبر کو سامنے آئے گا جبکہ کانگریس کو بی آر ایس کو شکست دینے کی امید ہے جو 2014 میں ریاست کی تشکیل کے بعد سے برسراقتدار ہے۔ تلنگانہ کے انچارج اے آئی سی سی سکریٹری روہت چودھری نے ای ٹی وی بھارت کو بتایا کہ جیت کا کریڈٹ راہول گاندھی کی حکمت عملی کو جانا چاہیے جنہوں نے بی آر ایس اور بی جے پی کے خلاف انتخابی مہم چلائی۔ ریاستی حکومت کی بدعنوانیوں کو اجاگر کیا اور کانگریس کے وژن کو عوام کے سامنے واضح کیا۔
ذرائع کے مطابق راہل گاندھی کی تلنگانہ سے متعلق حکمت عملی نے زمینی سطح پر ایک اہم تبدیلی لائی ہے۔ اے آئی سی سی کے ایک سینئر عہدیدار نے کہا، ’’گزشتہ سال نومبر میں ہونے والے ہائی پروفائل مونوگوڑہ اسمبلی ضمنی انتخاب تک کانگریس کو اقتدار کے لیے سنجیدہ دعویدار کے طور پر نہیں دیکھا جا رہا تھا لیکن اب تصویر کچھ الگ ہے۔
انہوں نے مزید کہا کہ جنوبی ریاست میں کانگریس کی طاقت کو بڑھانے کےلئے راہل گاندھی نے ایک تفصیلی منصوبہ مسودہ تیار کیا تھا جسے نافذ کیا گیا۔ مانک راو ٹھاکرے کو ریاست کے نئے AICC انچارج کے طور پر ریاستی ٹیم کو متحد کرنے کے مینڈیٹ کے ساتھ تعینات کیا گیا تھا۔ ریاستی قائدین سے ووٹروں سے رابطہ قائم کرنے کے لیے یاترا شروع کرنے کو کہا گیا اور ووٹروں کو یہ بتایا گیا کہ بی آر ایس اور بی جے پی سے ریاست کی ترقی ممکن نہیں ہے۔ عوام کی فلاح و بہبود کےلئے کانگریس حکومت ضروری ہے۔
