حکومت نے حال ہی میں دو کلاک ٹاورز کی گھڑیاں درست کی ہیں جن میں محبوب چوک اور معظم جاہی مارکٹ کی گھڑیاں شامل ہیں۔
دونوں ہی کلاک ٹاورز کی گھڑیاں اب چل تو رہی ہیں لیکن ان میں پہلے جیسی بات نہیں رہی ہے کیوںکہ پرانے طرز کی گھڑیاں میکانیکل طرز کی تھیں جن میں گھنٹے نصب تھے اور ان کی آواز دور تک سنائی دیتی تھی لیکن اب ان گھڑیوں کی جگہ نئی اور عام گھڑیوں نے لے لی جو مشین سے چلتی ہے۔
اب حیدرآباد اربن ڈیولپمنٹ اتھارٹی نے رمیش واچ کو جدید گھڑیوں کی ذمے داری سونپی ہے۔ تجربے کے طور پر پہلے ایک گھڑی نصب کی جائے گی بعد ازیں تمام گھڑیاں لگانے کی ذمے داری دی جائے گی۔
رمیش واچ کمپنی کے مالک لکشمن نے گھڑی کی تفصیلات بتاتے ہوئے کہا کہ یہ گھڑی جی پی ایس تکنیک سے لیس ہے۔ اس میں بار بار وقت ملانا نہیں پڑتا۔ جی پی ایس کی وجہ سے یہ گھڑی سیٹلائٹ سے جڑی رہتی ہے، اس لیے آگے پیچھے نہیں ہوتی اور اس کی آواز پرانے طرز کی گھڑیوں سے مماثلت رکھتی ہے جس سے کافی دور سے بھی وقت معلوم ہو جاتا ہے۔
