تلنگانہ کی وزیر بہبودی خواتین واطفال ستیہ وتی راتھوڑ نے کہا ہے کہ بی جے پی زیرقیادت مرکزی حکومت، تلنگانہ کو نقصان پہنچانے کی کوشش کررہی ہے کیونکہ ٹی آرایس حکومت یہاں پربی جے پی کی مخالف عوام،مخالف کسان اور مخالف مزدور پالیسیوں کے خلاف جدوجہد کررہی ہے۔انہوں نے مطالبہ کیاکہ مرکزی حکومت تلنگانہ سے مکمل دھان کی خریداری کرے۔ Satyavathi Rathod on Modi Government
انہوں نے انتباہ دیا کہ ٹی آرایس پارٹی، تلنگانہ سے دھان کی مکمل خریداری کے اعلان تک بی جے پی حکومت کے آگے نہیں جھکے گی۔دھان کی خریداری کے مسئلہ پر ٹی آرایس کے کارگذارصدر تارک راما راو کی جانب سے کی گئی احتجاج کی اپیل کے حصہ کے طورپر انہوں نے ضلع محبوب آباد میں رکن پارلیمان ٹی آرایس مالوت کویتا اور دیگر کے ساتھ احتجاج میں حصہ لیا۔اس موقع پر ٹی آرایس کے لیڈروں نے مطالبہ کیاکہ مرکزی حکومت تلنگانہ سے مکمل دھان کی خریداری کرے۔اسی دوران ریاستی وزیر پنچایت راج ای دیاکرراو نے بھی ہنمکنڈہ، ورنگل، جنگاوں اور دیگر مقامات پر احتجاج میں حصہ لیا۔چیف وہپ و ورنگل ویسٹ کے رکن اسمبلی ونئے بھاسکر نے ہنمکنڈہ میں ہوئے احتجاج میں حصہ لیا۔
یواین آئی
