تلنگانہ کے وزیر انفارمیشن ٹکنالوجی کے تارک راما راؤ نے زور دیتے ہوئے کہا ہے کہ ہیرو ملک میں جہاں بھی پیدا ہوتا ہے وہ ہیرو ہوتا ہے۔ عظیم مجاہد آزادی الوری سیتاراماراجو کو یاد رکھنا ایک بھارتی شہری کا فرض ہے۔ کے ٹی راما راؤ نے وزراء سرینواس گوڑ اور ٹی سرینواس یادو کے ساتھ الوری سیتاراما راجو کی 125ویں یوم پیدائش کے موقع پر شہرحیدرآباد کے ٹینک بنڈ پر منعقدہ تقریب میں شرکت کی۔ KTR on Alluri Sitarama Raju
انہوں نے الوری سیتاراما راجو کے مجسمہ پر پھول نچھاور کرکے ان کو خراج عقیدت پیش کیا۔بعد ازاں وزیرموصوف نے الوری سیتاراما راجوکی 125ویں یوم پیدائش پر تمام کو مبارکباد دی۔ انہوں نے کہا کہ تلنگانہ حکومت سرکاری طور پر سیتاراماراجو کی یوم پیدائش کی تقاریب کا اہتمام کررہی ہے۔انہوں نے کہا کہ کومرم بھیم نے جل، جنگل، زمین کے نعرے کے ساتھ اس خطہ کے قبائلیوں کے حقوق کے لیے اس وقت کے نظام کے خلاف زبردست جنگ لڑی تھی۔ اسی طرح الوری سیتا راما راجو نے تلگو عوام کے لیے انگریزوں کے خلاف سخت لڑائی کی۔ ایسے مجاہد آزادی کے جذبہ کے ساتھ وزیراعلی کے چندرشیکھر راؤ نامساعد حالات کے باوجود تلنگانہ کو تمام شعبوں میں ترقی کی راہ پر گامزن کرنے کے اقدامات کر رہے ہیں۔ انہوں نے کہا کہ وزیراعلی نے شہر کے خانم میٹ میں الوری بھون کی تعمیر کے لئے تین ایکڑ اراضی مختص کی ہے۔اس موقع پروزیر سرینواس گوڑ نے کہا کہ الوری سیتاراما راجو ایک عظیم ہیرو تھے۔ انہوں نے کہا کہ حکومت سرکاری طور پر الوری جینتی کا اہتمام کر رہی ہے۔
یو این آئی
