حیدرآباد: سڑک حادثہ میں فضائیہ کا عہدیدار ہلاک اور اس کی ساتھی زخمی

حیدرآباد میں پیش آئے ایک سڑک حادثہ میں بہار سے تعلق رکھنے والا بھارتی فضائیہ کا عہدیدار ہلاک اور دہلی کے اس کی ساتھی سافٹ ویئر انجینئر شدیدزخمی ہوگئی۔ یہ حادثہ کل شب حیدرآباد کے نواح میں واقع نارسنگی کے 'مائی ہوم اوتار' کے قریب اُس وقت پیش آیا جب ان کی بائیک چوراہے کے قریب حال ہی میں تعمیر شدہ گول دائرہ سے ٹکراگئی۔

اس حادثہ میں مرنے والے کی شناخت حیدرآباد کے بیگم پیٹ میں واقع ایئرفورس اسٹیشن میں کام کرنے والے عہدیدار 25 سالہ وکی کمار کے طور پر کی گئی ہے، جس کا تعلق بہار سے ہے۔ اس کی تعیناتی بیگم پیٹ ایرفورس اسٹیشن میں تھی جبکہ زخمی سافٹ ویئر انجینئر کا تعلق قومی دارالحکومت دہلی سے ہے۔

اس کی شناخت 25سالہ ایشا کے طورپر کی گئی ہے۔ وہ حیدرآباد کے گنڈی پیٹ علاقہ کی ایک ملٹی نیشنل کمپنی میں سافٹ ویئر انجینئر کے طور پر کام کررہی تھی۔ یہ دونوں بائیک پر جارہے تھے جبکہ ان کا مشترکہ دوست اسکوٹر پر ان کے پیچھے آرہا تھا جب یہ حادثہ پیش آیا۔

پولیس نے کہاکہ کمار اور ایشا چائے پینے کیلئے گچی باولی جارہے تھے۔ ایشا کی بہن سنجنا بھٹ کی شکایت پر پولیس نے وکی کے خلاف ایک معاملہ درج کرکے جانچ شروع کردی۔

پولیس کے مطابق کل شب تقریباً چار بجے یہ دونوں گنڈی پیٹ سے چائے پینے کے لئے گچی باولی جارہے تھے۔ جب ان کی بائیک'مائی ہوم اوتار'کے قریب پہنچی تو وکی نے اس کا توازن کھودیا اور یہ بائیک چوراہے پرتعمیر شدہ گول دائرہ سے ٹکراگئی۔

راہگیروں نے پولیس اور ایمبولنس کواس بات کی اطلاع دی جس کے بعد ان کو گچی باولی کے ایک پرائیویٹ اسپتال منتقل کیاگیا۔ بعد ازاں وکی کو بہتر علاج کے لئے دوسرے اسپتال منتقل کیاجارہا تھا کہ راستہ میں ہی اس کی موت ہوگئی۔ ایشا زیرعلاج ہے۔

پولیس نے کہاکہ ان دونوں کے سرپر زخم آئے تھے۔ سنجنا بھٹ کو کل شب تقریباً 4.30 بجے اس حادثہ کا علم ہوا جب اس نے ایشا کو فون کیا تاہم راہگیر نے اس کے فون کو اٹھا کر حادثہ کی اطلاع دی۔

یواین آئی