سرینگر: یونٹی مٹن ٹریڈرس ایسوسی ایشن کے بینر تلے درجنوں قصابوں نے پیر کے روز پریس کالونی میں جمع ہو کر اپنے مطالبات کو لے کر احتجاج درج کیا۔ احتجاجی ہمارے ساتھ انصاف کرو جیسے نعرے لگا رہے تھے۔
اس موقع پر یونٹی مٹن ٹریڈرس ایسو سی ایشن کے صدر محمد سلیم میر نے میڈیا کے ساتھ بات کرتے ہوئے کہا کہ ہمارے ساتھ نا انصافی ہور ہی ہے۔ انہوں نے کہا کہ ہماری دکانیں روز بروز سیل ہو رہی ہیں، وہ بھی بنا بتائے، کبھی بولتے ہیں لائسنسز کا مسئلہ ہے تو کبھی بولتے ہیں ریٹ کا معاملہ ہے‘۔
ان کا کہنا تھا کہ دو سال پہلے ہمارے ساتھ 535 روپیے فی کلو ریٹ مقرر ہوئی ہے تب سے اس میں کوئی اضافہ نہیں کیا گیا جبکہ ہم اس ضمن میں متعلقہ حکام کے پاس بھی گئے۔
اس حوالے سے یونٹی مٹن ٹریڈرس ایسوسی ایشن کے صدر نے کہا کہ اب ہمارے کنبوں پر اس کا اثر پڑنے لگا ہے۔ انہوں نے کہا کہ "اگر ہمارے ساتھ انصاف نہیں کیا گیا تو ہم اپنے کنبوں کو لے کر بھوک ہڑتال پر بیٹھیں گے‘۔
انہوں نے سوالیہ انداز میں کہا کہ ہماری دکانیں سیل کیوں کی جا رہی ہیں ریٹ مقرر کریں جو قانون دہلی ، لداخ یا جموں میں ہے وہ یہاں کشمیر میں کیوں نہیں ہے‘۔
محمد سلیم نے کہا کہ اس طبقے سے دو ڈھائی لاکھ لوگ جڑے ہوئے ہیں جن سب کے ساتھ نا انصافی ہو رہی ہے۔ انہوں نے کہا کہ ہماری اپیل ہے کہ ہمیں بھی کام کرنے دیا جائے تاکہ ہم بھی اچھی طرح سے زندگی گذار سکیں۔
یہ بھی پڑھیں: Mutton Shops Sealed In Srinagar سرینگر میں قصابوں کے خلاف کارروائی کا سلسلہ جاری
