سرینگر سے تعلق رکھنے والی رحمت رتن پنجابی فلم میں جلوہ گر ہونگی

رحمت نے بتایا 'پی ٹی سی کا گرینڈ فائنل مقابلہ جیتنے کے بعد متعدد پنجابی میوزک ڈائریکٹرز اور پروڈیوسرز مجھ سے رابطہ کرنے لگے اور اب تک میں نے چار پنجابی گانے گائے ہیں جو پہلے ہی ریلیز ہوئے ہیں اور کافی حد تک کامیاب بھی ہوئے ہیں-'

کشمیر سے تعلق رکھنے والی ایک 25 سالہ کشمیری لڑکی پنچابی سنیما پر جلوہ گر ہورہی ہے- سرینگر کے مہجورنگر سے تعلق رکھنے والی رحمت رتن ایک پنچابی فلم میں اداکارہ بن کر سامنے آرہی ہیں- رحمت رتن کا اصل پیشہ ڈاکٹری رہا ہے تاہم انہوں نے اس پیشے کو خیر باد کرکے اداکاری میں قدم رکھا- رحمت ایک پنجابی فلم میں سامنے آ رہی ہیں اور یہ ان کے کیرئیر کی پہلی فلم ہوگی-
سرینگر کے علاقے مہجورنگر سے تعلق رکھنے والی رحمت نے بتایا کہ جس فلم میں انہیں کام ملا ہے اس کی شوٹنگ فروری 2021 میں شروع ہوگی۔ فلم کی شوٹنگ پنجاب اور پولینڈ میں ہوگی اور یہ ان کے فلمی کیریئر کی پہلی فلم ہے جس میں وہ اداکارہ کے طور کام کریں گی- اس سے قبل انہوں نے پی ٹی سی کا گرینڈ فائنل بھی اپنے نام کیا ہے تاہم گزشتہ سال جموں و کشمیر میں انٹرنیٹ پر پابندی کی وجہ سے اس کی اس کامیابی کے بارے میں زیادہ تر لوگ بے خبر تھے-
رحمت نے ہماچل پردیش کے ایک ڈینٹل کالج سے بی ڈی ایس کی ڈگری حاصل کی ہے تاہم ان کا ماننا ہے کہ وہ ڈنٹسٹ کے بجائے ہمیشہ اداکاری میں دلچسپی رکھتی تھیں اور اسی پر آج بھی قائم ہیں۔ رحمت کا کہنا ہے کہ وہ اداکاری پر ہی اپنی تمام توجہ مرکوز کرنا چاہتی ہیں اور اس طرح سے اپنی صلاحیتوں کو بروئے کار لانا چاہتی ہیں۔
انہوں نے بتایا 'پی ٹی سی کا گرینڈ فائنل مقابلہ جیتنے کے بعد متعدد پنجابی میوزک ڈائریکٹرز اور پروڈیوسرز مجھ سے رابطہ کرنے لگے اور اب تک میں نے چار پنجابی گانے گائے ہیں جو پہلے ہی ریلیز ہوئے ہیں اور کافی حد تک کامیاب بھی ہوئے ہیں-'
رحمت نے تمام لڑکیوں سے اپیل کی کہ وہ ہمیشہ اپنے من پسند کیریئر کا انتخاب کریں اور اسی پر اپنی تمام تر توجہ مرکوز کریں تاکہ کامیابی ان کے قدم چومے-