نیشنل کانفرنس کے سینئر رہنما سلمان ساگر سے خصوصی گفتگو

جموں و کشمیر میں ڈسٹرکٹ ڈیولپمنٹ کونسل اور پنچایتی و بلدیاتی ضمنی انتخابات کے تیسرے مرحلے کی پولنگ پر امن طریقے سے مکمل ہوئی۔ جموں و کشمیر میں 33 انتخابی حلقوں میں پولنگ ہوئی جن میں 305 امیدوار اپنی قسمت آزما رہے ہیں۔ کشمیر میں 16 حلقے ہیں جن میں 166 امیدوار ہیں جبکہ جموں میں 17 حلقے ہیں جن میں 139 امیدوار ہیں۔

جموں و کشمیر میں ضلع ترقیاتی انتخابات کا تیسرا مرحلہ اختتام پذیر ہوا۔ ڈی ڈی سی انتخابات کے تیسرے مرحلے میں 50.53 فیصد ووٹنگ ہوئی، انتخابات کے تعلق سے نیشنل کانفرنس کے سینئر رہنما سلمان ساگر نے تمام رائے دہندگان کا شکریہ ادا کیا۔

ای ٹی وی بھارت سے خصوصی گفتگو میں سلمان ساگر نے کہا کہ ' انتخابات میں عوام کا بڑے پیمانہ پر شامل ہونا خوش آئند بات ہے۔ اس سے یہ صاف ظاہر ہوتا ہے کہ' لوگوں کو ابھی بھی اس بات پر اعتماد ہے کہ ووٹ ڈالنے سے مسائل حل ہو سکتے ہیں۔

جنوبی کشمیر میں اپنی پارٹی کے امیدوار پر نامعلوم افراد کی جانب سے ہوئے حملے کی مذمت کرتے ہوئے انہوں نے کہا کہ ' انتظامیہ امیدواروں کو حفاظت فراہم کرنے کے دعوے کر رہی ہے جبکہ اس واقعے سے یہ صاف ظاہر ہوتا ہے کہ وہ سارے دعوے کھوکھلے ہیں۔

انہوں نےکہا کہ' ابھی بھی پانچ مرحلوں کے انتخابات ہونے باقی ہیں۔ سکیورٹی ایجنسیز کو چاہیے کہ وہ امیدوار، پارٹی اور ان کے کارکنان کی حفاظت کے لئے بندوبست کرے، تاکہ ایسے واقعات دوبارہ پیش نہ آئیں۔