’نامعلوم فون نمبر کے کالز کا جواب نہ دیں‘

کشمیر میں گزشتہ ایک ہفتے سے متعدد موبائل صارفین شکایت کر رہے ہیں کہ وسطی ایشیا اور سعودی عرب کے فون نمبروں سے نا معلوم افراد کال کر رہے ہیں جس سے وہ کافی پریشان ہیں۔

سرینگر سائبر پولیس کا کہنا ہے کہ 'یہ ایک قسم کی آن لائن اسکیم ہے جس سے نامعلوم افراد وسطی ایشیا اور سعودی عرب کے موبائل نمبر سے فون کرکے لوگوں کے ساتھ آن لائن دھوکہ دہی کرتے ہیں۔

سرینگر سائبر پولیس کے ایس ایس پی طاہر اشرف بھٹی نے اس معاملے میں کہا کہ صارفین کو احتیاط برتنی ہوگی اور کسی بھی نامعلوم نمبر کے کالز کا جواب نہیں دینا ہوگا۔

ان کا کہنا تھا کہ نامعلوم کالرز، صارفین کی توجہ حاصل کرنے کے لیے انہیں گانا، لاٹری یا دیگر دلچسپ باتوں میں مشغول رکھتے ہیں جس دوران کالرز آن لائن پیسے کماتے ہیں۔

انہوں نے لوگوں کو آگاہ کیا صارفین احتیاط سے کام لیں اور اس طرح کے نمبروں سے آنے والے کال کا جواب نہ دیں اور نہ ہی دوبارہ اس نمبر پر کال کریں۔