نیشنل اور انٹر نیشنل فٹبالرز فورم کی جانب سے ٹی آر سی گراؤنڈ سرینگر میں ایک تقریب منعقد ہوئی جس میں لیفٹیننٹ گورنر کے مشیر فاروق احمد خان نے مہمان خصوصی کے طور شرکت کی جبکہ ضلع انتظامیہ کے دیگر افسران کے علاوہ مختلف جگہوں سے آئے ہوئے جونئیر اور سینئر فٹبال کھلاڑیوں نے بھی شرکت کی۔ منعقدہ تقریب میں مہمان خصوصی نے وادی کشمیر کے مختلف اضلاع میں قائم 15 فٹبال اکیڈیمیز میں تربیت پارہے جونئیر فٹبال کھلاڑیوں میں کھیل کا سازو سامان تقسیم کیا۔
اس موقع پر جونئیر اور سینئر فٹبال کھلاڑیوں کے میچ بھی منعقد کئے گئے۔ جونئیر کھلاڑیوں کی بہتر کارکردگی سے فٹبال شائقین کافی خوش ہوئے۔ نیشنل اور انٹرنیشنل فٹبالرز فورم نے اب تک وادی میں کئی بڑے فٹبال کے مقابلے منعقد کروائے ہیں جس میں یہاں کئی کھلاڑی اپنی صلاحتوں کا بھر پور مظاہرہ کرچکے۔ فورم کا کہنا ہے کہ ان کا مقصد جموں وکشمیر میں فٹبال کو فروغ دینا ہے۔ وہیں ان نوجوانوں کو بھی اس کھیل کی طرف مائل کرنا ہے جو نوجوان منشیات کی لت میں مبتلا ہوگئے ہیں۔
وہیں فٹبال کوچ ساجد یوسف نے کہا کہ نیشنل اور انٹرنشنل فورم وادی کشمیر میں بنیادی سطح پر فٹبال کھیل کو آگے لے جانے میں کوشاں ہے تاکہ زیادہ سے زیادہ نوجوان اس کھیل میں اپنا نام کمائے۔ انہوں نے کہا کہ فورم اب اس طرح کی دوسری تقریب جموں میں منعقد کرنے جارہی ہے۔
اس موقع پر مختلف اکیڈیمیز میں تربیت پارہے بچوں نے خوشی کا اظہار کیا۔
واضح رپے نیشنل اور انٹر نیشنل فٹبالرز فورم کو ریاستی اور ملکی سطح پر اپنا نام کما چکے کھلاڑیوں نے معرض وجود میں لایا ہے۔
