پیپلز ڈیموکریٹک پارٹی (پی ڈی پی) کی صدر اور سابق وزیر اعلیٰ محبوبہ مفتی پارٹی کارکنان سے ملاقات کرنے کی غرض سے نو جولائی سے تین روزہ دورے پر جموں پہنچیں گی، جہاں وہ جموں خطے کے پارٹی کے رہنماؤں و کارکنان سے ملاقات کریں گی۔
پیپلز ڈیموکرٹیک پارٹی (پی ڈی پی) کے ترجمان برائے صوبہ جموں فردوس ٹاک نے پارٹی صدر محبوبہ مفتی کے جموں دورے کے بارے میں تفصیلات فراہم کرتے ہوئے کہا کہ 'محبوبہ مفتی 9، 10 اور 11 جولائی کو پی ڈی پی دفتر گاندھی نگر میں جموں میں پارٹی کارکنان سے خطاب کریں گی۔ بعد ازاں جموں خطہ کے پارٹی رہنماؤں کے ساتھ میٹنگ بھی منعقد ہوگی۔
یہ بھی پڑھیں: پاکستان سے بات چیت سے کشمیریوں کو سکون ملتا ہے: محبوبہ مفتی
فردوس ٹاک کے مطابق میٹنگ میں پارٹی کے امور اور مستقبل میں لائحہ عمل کے بارے میں فیصلہ لیا جائے گا۔ انہوں نے مزید کہا کہ محبوبہ مفتی آنے والے دنوں میں جموں کے مختلف علاقوں کا دورہ کر کے پارٹی کے لیڈران و کارکنان سے ملاقات کریں گی۔
