راجوری میں پراسرار اموات: 300 مکین قرنطینہ میں، مویشیوں کی دیکھ بھال بڑی تشویش

کوٹرنکا اسسٹنٹ ڈپٹی کمشنر دل میر نے ای ٹی وی بھارت کو بتایا کہ پچھلے تین دنوں میں کوئی نیا کیس رپورٹ نہیں ہوا۔

جموں: جموں و کشمیر کے راجوری ضلع میں 17 پراسرار اموات کے بعد خوف و ہراس ہے۔ انتظامیہ کی جانب سے احتیاطی تدابیر اختیار کرتے ہوئے بڈھال گاؤں کے 300 سے زائد لوگوں کو راجوری کے اسپتال میں قرنطینہ میں رکھا گیا ہے۔ جبکہ متاثرہ خاندانوں کے قریبی رشتہ داروں کو آئسولیشن سنٹر میں منتقل کر دیا گیا ہے۔ پراسرار موت کے ذمہ دار زہریلے مادوں کی شناخت کرنے کی کوششوں کے درمیان کچھ دیگر دیہاتی ہسپتالوں میں داخل ہیں۔

کوٹرنکا علاقے کے دور افتادہ گاؤں بڈھال کے تین خاندانوں کے 17 افراد کی پراسرار بیماری کی وجہ سے موت کے بعد علاقے میں میڈیکل الرٹ جاری کر دیا گیا ہے اور اس کے پیش نظر جی ایم سی راجوری کے تمام ڈاکٹروں اور پیرا میڈیکس کی چھٹیاں منسوخ کر دی گئی ہیں۔ بڈھال گاؤں کو کنٹینمنٹ زون قرار دیا گیا ہے، اور تمام سرکاری اور نجی اجتماعات پر پابندی عائد کر دی گئی ہے۔

کوٹرنکا اسسٹنٹ ڈپٹی کمشنر دل میر نے ای ٹی وی بھارت کو بتایا کہ پچھلے تین دنوں میں کوئی نیا کیس رپورٹ نہیں ہوا ہے۔ تاہم، ہم نے 300 سے زیادہ دیہاتیوں کو قرنطینہ میں رکھا ہے۔ محکمہ زراعت، محکمہ حیوانات اور بھیڑ پالنے کا محکمہ گاؤں میں جانوروں کو چارہ فراہم کرنے کے کام میں مصروف ہے۔

رضاکار جانوروں کی دیکھ بھال کے لیے آگے آئے

ایسے وقت میں جب گاؤں کے لوگ قرنطینہ میں ہیں، پڑوسی گاؤں کے رضاکار جانوروں کی دیکھ بھال کے لیے آگے آئے ہیں۔ محمد کبیر جیسے نوجوان جانوروں کو چارہ اور پانی فراہم کرنے میں مصروف ہیں۔

کبیر نے کہا، "ہم نے قرنطینہ کیے گئے گاؤں والوں کو یقین دلایا ہے کہ ان کے جانور محفوظ ہاتھوں میں ہیں۔ ہماری ٹیم گائے، بھینس، بکریوں اور بھیڑوں کو چارہ فراہم کرنے اور ان کی دیکھ بھال کے لیے چوبیس گھنٹے کام کر رہی ہے۔"

بڈھال گاؤں میں گزشتہ دو ماہ کے دوران 14 بچوں سمیت 17 افراد پراسرار بیماری کی وجہ سے ہلاک ہوچکے ہیں، جب کہ متعدد کو اسپتال میں داخل کرایا گیا ہے۔