جموں اینڈ کشمیر اکیڈمی آف آرٹ کلچر اینڈ لینگویجز کی طرف سے آج ٹیگور ہال سرینگر میں سالانہ ڈرامہ فیسٹیول کا آغاز کیا گیا۔ اس سلسلے میں ٹیگور ہال میں ایک افتتاحی تقریب کا اہتمام کیا گیا۔ جس میں تھیئٹر شائقین کی ایک بڑی تعداد موجود تھی۔ سرکردہ تھیئٹر آرٹسٹ بشیر دادا تقریب کے مہمانِ خصوصی تھے جبکہ دوردرشن سرینگر کے شعبہ خبر کے ڈائریکٹر قاضی سلمان مہمانِ ذی وقار کی حیثیت سے موجود تھے۔
فیسٹیول کے پہلے دن مہک ڈرامیٹک کلب سرینگر نے سجود سیلانی کا تحریر کردہ ڈرامہ "وُترہ بِنیُل" پیش کیا جسے وہاں موجود شائقین نے کافی سراہا اور اس ڈرامے کا خوب لطف اٹھایا۔
اکیڈمی کی طرف سے وہاں موجود مہمانوں، تھیئٹر سے وابستہ شخصیات اور میڈیا نمایندوں کا استقبال کرتے ہوئے اکیڈمی کے کشمیر آفس کی انچارج فرحت لون نے اہنے استقبالیہ کلمات میں کہا 'سنہ 2019-20 میں مختلف وجوہات کی بناء پر تھیئٹر فیسٹول کا انعقاد نہیں ہوسکا۔ اب کی بار تمام تر مشکلات کے باوجود اس بات کو یقینی بنایا گیا کہ اس فیسٹول کا انعقاد عمل میں لایا جاسکے'۔
اس فیسٹیول میں 13 تھیئٹر گروپز اپنے ڈرامے پیش کررہے ہیں اور یہ فیسٹیول 27 مارچ تک جاری رہے گا۔ وہیں کل یعنی 16 مارچ کو یِمبرزل یوتھ کلب " ارژہ کال" ڈرامہ پیش کرے گا۔
یہ بھی پڑھیے
ترال: دور افتادہ گاؤں بنگہ ڈار انتظامیہ کی عدم توجہی کا شکار
تقریب کے مہمانِ خصوصی بشیر دادا نے اس فیسٹول کے انعقاد کے لئے اکیڈمی کو مبارکباد پیش کی اور امید ظاہر کی کہ اس فیسٹول کے دوران فنکار اور تھیئٹر سے وابستہ شخصیات اپنی بہترین صلاحیتوں کا مظاہرہ کریں گے۔
