حالات کی عکس بندی کرنے والا سینڈ آرٹسٹ

ساحل منظور نے گزشتہ برس انتظامیہ کو سرینگر شہر کی فلائی اوور و دیگر عمارتوں کو خوبصورت بنانے کی پیشکش بھی کی تھی۔ تاہم ابھی تک اس سلسلہ میں کوئی پیش رفت نہیں ہوئی ہے۔

وادی کشمیر میں ہنر کی کوئی کمی نہیں ہے تاہم عالمی وبا کورونا وائرس کی وجہ سے عائد لاک ڈاؤن سے نوجوان گھروں تک محدود ہو گئے ہیں۔ ایسے ہی ایک ہنر مند نوجوان ساحل منظور ہیں جو سرینگر کے قمرواری سے تعلق رکھتے ہیں۔ ساحل نے لاک ڈاؤن کے دوران اپنے گھر میں بیٹھ کر اپنے فن کا استعمال کرکے عوام کو عالمی وبا سے بچنے کے لیے جانکاری فراہم کی۔

ساحل وادی کے واحد سینڈ آرٹسٹ ہیں اور یہ فن انہوں نے خود ہی یوٹیوب ویڈیوز دیکھ کر سیکھا ہے۔ گزشتہ برس پانچ اگست کے بعد انٹرنیٹ خدمات پر پابندی اور اس کے بعد کورونا وائرس کے چلتے لاک ڈاؤن کی وجہ سے وہ اپنے فن کا مظاہرہ اس طریقے سے نہیں کر پائے۔ تاہم ان کا کہنا ہے کہ انہوں نے اُمید نہیں چھوڑی اور اس دوران بھی اپنے فن کو بہتر کرنے کے لئے مشق کرتے رہے۔
ساحل کا کہنا ہے کہ "میں اپنے گھر پر ہی محدود تھا۔ کورونا وائرس جیسے ہی وادی میں اپنا شکنجہ کسنے لگا تو میں نے بھی اپنی ذمہ داری سمجھ کر عوام کو بیدار کرنے کے لیے ویڈیوز بنائے اور سوشل میڈیا پر مشتہر کئے۔ میری کوشش کتنی رنگ لائی یہ میں نہیں جانتا لیکن میں نے بس اپنا فرض ادا کیا۔"

ان کا مزید کہنا تھا کہ "اسی دوران میرے پسندیدہ اداکار سوشانت سنگھ راجپوت کی خودکشی کی خبر آئی۔ یہ میرے لئے ایک صدمے سے کم نہیں تھا۔ ان کی اداکاری مجھے بہت پسند تھی۔ میں چاہتا ہوں کی ان کی آخری فلم دل بیچارا سینما گھر میں دکھائی جائے نہ کی نیٹ فلکس یا دیگر چھوٹی پلیٹ فارم پر۔ بس اپنے پسندیدہ اداکار کے لیے بھی میں نے ایک پوٹریٹ بنایا جس میں نے ان کی وسیع شخصیت کو بیان کرنے کی کوشش کی۔"قابل ذکر ہے کہ ساحل نہ صرف سینڈ آرٹ بناتے ہے بلکہ مورلز بھی کرتے ہیں۔ انہوں نے گذشتہ برس انتظامیہ کو سرینگر شہر کی فلائی اور دیگر عمارتوں کو خوبصورت بنانے کی پیشکش بھی کی تھی۔ تاہم ابھی اس ضمن میں وادی میں نامساعد حالات کی وجہ سے کوئی پیش رفت نہیں ہوئی ہے لیکن انہیں اُمید ہے کہ آنے والے دنوں میں ان کا یہ خواب بھی پورا ہوگا۔