جموں و کشمیر ایل جی انتظامیہ نے شیر کشمیر انسٹی ٹیوٹ آف میڈیکل سائنز صورہ کے تمام ڈاکٹرز کی نجی پریکٹس پر پابندی عائد کی ہے۔
اس ضمن میں جی اے ڈی کی جانب سے باضابطہ طور ایک آرڈر زیر نمبر 129/2015 جاری کیا گیا ہے۔
حکمنامہ جاری ہونے کے فوراً بعد سکمز صورہ کے ڈائریکٹر ڈاکٹر جی اے آہنگر نے حکم کی تعمیل کرتے ہوئے ہسپتال کے سبھی ڈاکڑ صاحبان اور مختلف شعبہ جات کے سربراہان سے حکمنامے پر عمل پیرا ہونے کی تاکید کی ہے۔
وہیں انہوں نے زور دیا کہ اگر کوئی ڈاکٹر نجی کلنک پر پرائیوٹ پریکٹس کرتے ہوئے پایا گیا تو اس کے خلاف قانون کے تحت سخت کارروائی عمل میں لائی جائے گی۔
انہوں نے ہسپتال کے تمام شعبہ جات سے وابستہ ڈاکٹر صاحبان کی تعریفیں کیں اور کہا کہ کورونا وائرس وبا کے دوران سبھی ڈاکٹر صاحبان، نرسز اور دیگر نیم طبی عملے نے اپنے فرائض بخوبی انجام دیے اور آگے بھی دیتے رہیں گے۔
انہوں نے اُمید ظاہر کی کہ ہسپتال کے ڈاکٹر صاحبان اپنی فرض شناسی کا ثبوت پیش کرتے ہوئے نجی پریکٹس سے پرہیز کریں گے اور ہسپتال میں اپنی ڈیوٹی بہتر طور انجام دیں گے۔
