ایسوسی ایشن کے صدر ڈاکٹر نثارالحسن نے کہا کہ یہاں کے ہیلتھ ورکرز جن میں ڈاکٹرز، نرسز کے علاوہ دیگر نیم طبی عملہ شامل ہیں، میں اکثر نے ابھی ٹیکہ نہیں لگایا ہے۔
انہوں نے کہا کہ گورنمنٹ کالج اور اس سے منسلک ہسپتالوں میں کام کر رہے 7 ہزار طبی اور نیم طبی عملے میں محض ابھی تک 1167 افراد نے ہی ٹیکہ لگایا ہے جو کہ 16.67 فیصدی ہے۔ جبکہ 83.33 فیصدی ابھی بھی بغیر ویکسینیشن کے ہیں۔
ڈاکٹرز ایسوسی ایشن کے صدر نے کہا کہ ہیلتھ ورکرز میں ٹیکہ کاری کے عمل سے دور رہنے سے روکاوٹ پیدا ہوسکتی ہے۔ وہیں عام لوگوں کو ویکسین لینے پر آمادہ کرنے میں بھی ایک بڑا چلینج ثابت ہوگا۔
ڈاکٹر نثارالحسن نے اپنے ایک بیان میں مزید کہا کہ صحت عامہ کے کارکنان میں ویکسین کا اعتماد عوامی اعتماد کو فروغ دینے میں کافی معاون ہوگا۔
انہوں نے تمام ہیلتھ ورکرز پر زور دیا کہ وہ کووڈ مخالف ٹیکہ لگائے اور اس ویکسینیشن کے عمل میں آگے بڑھنے میں اپنا بہتر رول ادا کریں۔
