کشمیر میں اسکول یکم مارچ کو کھلیں گے

ناظمِ تعلیم، کشمیر محمد یونس ملک نے کہا کہ وادی میں اسکول اپنے شیڈول کے مطابق یکم مارچ کو ہی کھلیں گے۔ انہوں نے کہا کہ اسکولوں کے سربراہان سے کہا گیا ہے کہ وہ اس سلسلے میں تیاری پانچ دن پہلے ہی مکمل کر لیں۔

یونس ملک نے جمعے کو یہاں ایک تقریب کے حاشئے پر نامہ نگاروں کو بتایا: 'اسکول کھلنے کے معاملے پر کوئی کنفیوژن نہیں ہے۔ آپ کو پتہ ہے کہ سرکار کی طرف سے ایک حکمنامہ جاری ہوا ہے۔ اسکول اپنے شیڈول کے مطابق یکم مارچ کو ہی کھلیں گے۔ اسی حکمنامے کے مطابق جموں میں اسکول کھل چکے ہیں'۔

ان کا مزید کہنا تھا: 'چونکہ بہت عرصے کے بعد ہم اسکولوں کو کھولنے جا رہے ہیں۔ اس لئے اسکولوں کے سربراہان پر ذمہ داری عائد ہوتی ہے کہ وہ پانچ چھ دن پہلے ہی تمام تر تیاری مکمل کر لیں۔ انہیں یقینی بنانا ہوگا کہ اسکول کھلنے کے وقت ایس او پیز کی عمل آوری میں کوئی کوتاہی نہیں ہونی چاہیے'۔