سرینگر (جموں کشمیر) : حکومت نے دھیرج گپتا (آئی اے ایس) کو جموں و کشمیر بورڈ آف پروفیشنل انٹرنس ایگزامنیشن (BOPEE) کا عبوری چیئرمین مقرر کیا ہے۔ منگل کو جموں وکشمیر لیفٹیننٹ گورنر انتظامیہ نے آئی اے ایس، دھیرج گپتا کو BOPEEکا عبوری چیرمین تعینات کرنے کے حوالہ سے باضابطہ طور ایک حکمنامہ جاری کیا ہے۔
ایل جی انتظامیہ کی جانب سے جموں و کشمیر بورڈ آف پروفیشنل انٹرنس ایگزامینیشن ایکٹ 2002 کے سیکشن 4 کے تحت حاصل اختیارات کو خاطر میں لائے گئے ہیں جس کی رو سے دھیرج گپتا، پرنسپل سیکریٹری، محکمہ جنگلات و ماحولیات کو اپنے فرائض کے علاوہ جے کے بورڈ آف پروفیشنل انٹرنس ایگزامنیشن کے چیئرمین کا اضافی چارج بھی سنبھالیں گے۔ حکم نامہ کے مطابق دھیرج گپتا اپنے فرائض کے علاوہ راج کمار گوئل، آئی اے ایس مالیاتی کمشنر کی جگہ عبوری انتظام کے طور پر، اگلے احکامات تک، عبوری فرائض انجام دیں گے۔
مزید پڑھیں: RK Goyal is BOPEE Chairman: آر کے گوئل کو BOPEEچیئرمین کا اضافی چارج
واضح رہے کہ بورڈ آف پروفیشنل انٹرنس ایگزامینیشن پر ماضی میں دھاندلیوں کے کئی الزامات عائد کیے گئے ہیں۔ بوپی کے ایک سابق چیئرمین مشتاق پیر پر دھاندلی کے الزامات صحیح پائے گئے جن کی پاداش میں انہیں نہ صرف عہدے سے برطرف کیا گیا بلکہ ان پر جرمانہ عائد کرکے انہیں جیل بھیج دیا گیا۔ مشتاق پیر پر میڈیکل انٹرنس کے پیپر، امتحانات سے قبل ہی، لیک کرنے کے عوض میں کروڑوں روپے کی رقم اینٹھنا کا الزام عائد کیا گیا تھا جو بعد میں صحیح ثابت ہوا۔ علاوہ ازیں گزشتہ برسوں کے دوران بوپی سمیت دیگر متعدد ریکروٹنگ ایجنسیز پر بھرتی عمل میں دھاندلیوں کے الزامات عائد کیے گئے ہیں۔
