کشمیر زون پولیس کے انسپکٹر جنرل وجے کمار کا کہنا ہے کہ کشمیر میں تمام 'سافٹ ٹارگیٹ' کو حفاظت فراہم کرنا ممکن نہیں ہے۔ اسی کے ساتھ ان کا یہ بھی کہنا تھا کہ جموں و کشمیر پولیس ایک پیشہ ور فورس ہے جو حالات کو سنبھالنا بخوبی جانتی ہے۔
انہوں نے کہا کہ ہم لوگ یہاں امن بحال کرنے کے لئے سخت محنت کر رہے ہیں اور آگے بھی کرتے رہیں گے۔ موصوف انسپکٹر جنرل نے ان باتوں کا اظہار ہفتے کے روز یہاں نامہ نگاروں کے سوالوں کا جواب دینے کے دوران کیا۔
انہوں نے کہاکہ 'میں نے بار بار کہا کہ یہاں سیکورٹی کی کوئی چوک نہیں ہوتی ہے۔ جن لوگوں کو نشانہ بنانا آسان ہے، ان کو نشانہ بنایا جا رہا ہے۔ ان سافٹ ٹارگیٹ کو نشانہ بنایا گیا ہے، جن کو ہم نے سیکورٹی فراہم نہیں کی تھی۔ کیونکہ سبھی سافٹ ٹارگیٹ کو سیکورٹی فراہم کرنا ممکن نہیں ہے'۔
سیاسی لیڈروں کی طرف سے پولیس پر سوال اٹھانے کے بارے میں پوچھے جانے پر ان کا کہنا تھا کہ 'سیاسی لیڈران ’الٹا پلٹا‘ بولتے رہتے ہیں، یہ ان کا کام ہے۔ ہم ایک پیشہ ور فورس ہیں۔ ہم اپنا کام جانتے ہیں جیسے ایک ڈاکٹر کو ہی معلوم ہوتا ہے کہ علاج کس طرح کرنا ہے'۔
کمار نے کہا کہ بندرو صاحب کی ہلاکت کے بعد ایک پریس کانفرنس کے دوران میں نے کہا تھا کہ ہم امن قائم کرنے کے لئے سخت محنت کر رہے ہیں اور آگے بھی کرتے رہیں گے۔ انہوں نے کہا کہ اسکول پرنسپل کی ہلاکت میں ملوث جنگجوؤں کے ایک گروپ میں سے دو کو گذشتہ روز مارا گیا۔
ان کا کہنا تھا کہ ’مہران نے اسکول ٹیچر پر پستول سے گولیاں چلائیں اور پانچ جنگجو یہ واقعہ کو انجام دینے کے لیے ذمہ دار تھے‘۔
یو این آئی