علیحدگی پسند تنظیم کل جماعتی حریت کانفرنس نے وادی کشمیر کے معروف صحافی اور انگریزی روزنامہ Rising Kashmir کے بانی و مدیر اعلیٰ شجاعت بخاری کی تیسری برسی پر انکی میدان صحافت، سیاست اور سماج کے تئیں خدمات کو خراج عقیدت ادا کیا ہے۔
حریت کانفرنس نے بیان جاری کرتے ہوئے کہا: ’’مرحوم کو اپنی اصول پسندی اور حق گوئی کی قیمت اپنی قیمتی جان اور ابھرتی جوانی کو قربان کرکے ادا کرنی پڑی۔‘‘
بیان میں حریت کانفرنس نے شجاعت بخاری کو ایک اصول پسند، دیانتدار اور بے باک صحافی قرار دیتے ہوئے کہا کہ ’’شجاعت بخاری نے کبھی بھی صحافتی اصولوں کے تئیں سمجھوتہ نہیں کیا اور وہ ہمیشہ غلط کو غلط اور صحیح کو صحیح کہتے اور لکھتے رہے۔‘‘
بیان میں مزید کہا گیا ہے کہ ’’شجاعت بخاری ایک درد مند دل رکھتے تھے جو کشمیر کے مظلوم عوام اور سماج کیلئے دھڑکتا تھا۔‘‘
قابل ذکر ہے کہ وادی کشمیر کے معروف صحافی سید شجاعت بخاری کو سرینگر کی پریس کالونی میں نا معلوم بندوق برداروں نے سنہ 2018میں گولیاں برسا کر ہلاک کر دیا تھا۔ اس واقعے میں انکے محافظین بھی ہلاک ہو گئے تھے۔
