لاک ڈاؤن کا چوتھا مرحلہ جاری ہے تاہم عید کی تیاریوں کے تعلق سے لوگوں کا رخ بازاروں کی اور ہے۔ جس کے چلتے انتظامیہ نے بازاروں میں لوگوں کی بھیڑ کم کرنے کے لیے لاک ڈائون میں سختی برتنی شروع کر دی جس بیچ پولیس کی جانب سے کئی جگہوں پر لوگوں کے ساتھ زیادتی کے الزامات بھی عائد کیے جا رہے ہیں ایسا ہی واقعہ مبینہ طور مشہور فٹبال کھلاڑی معراج الدین وڈو کے ساتھ بھی پیش آیا۔
سنیچر کی صبح معراج اپنی علیل ماں کی عیادت کے لیے گھر سے رعناواری کے لیے جا رہے تھے اور معراج کو حیدرپورہ سے بڈشاہ چوک تک کسی بھی پولیس یا سیکورٹی اہلکار نے نہیں روکا لیکن معراج کے مطابق جوں ہی انہوں نے بڈشاہ پل پار کیا تو انہیں ’’روکا بھی گیا، مارا پیٹا بھی گیا اور گالیاں بھی دی گئیں۔‘‘
معراج نے ای ٹی وی بھارت کو فون پر تفصیلات فراہم کرتے ہوئے کہا کہ ’’میری والدہ کافی عرصے سے بیمار ہیں۔ اس لیے ایمرجنسی میں صبح نکلنا پڑا۔ میری مجبوری سمجھ کر کسی نے نہیں روکا لیکن بڈشاہ پل پار کرتے ہی مائسمہ تھانے کے اسٹیشن ہاؤس آفیسر نے میرے ساتھ پہلے بدتمیزی کی، گالیاں دیں، والدہ کی شان میں بدکلامی کرکے میری گاڑی لیکر روانہ ہو گئے۔ وہاں موجود ایک پولیس اہلکار نے میرے ساتھ مار پیٹ بھی کی۔ میرا فون بھی چھین لیا گیا۔‘‘
اُن کا مزید کہنا تھا کہ ’’دو گھنٹے تھانے میں بیٹھنے کے بعد انہوں نے مجھے فون کرنے کی اجازت دی۔ جس کے بعد مجھے رہا کیا گیا۔ مجھے حیرانی ہوتی ہے کہ میرے ساتھ ایسا سلوک کیا گیا تو عام آدمی کے ساتھ پولیس کیا برتائو کرتی ہوگی! میں چاہتا ہوں کی ان پولیس افسران کے خلاف سخت کارروائی ہونی چاہیے۔‘‘
معراج نے اپنے ساتھ پیش آئے واقعے کے تعلق سے ٹویٹ کرکے بھی انتظامیہ سے جواب طلب کیا ہے۔ وہیں اپنا رد عمل ظاہر کرتے ہوئے ایس ایس پی سرینگر ڈاکٹر حسیب مغل نے ای ٹی وی بھارت کو بتایا کہ ’’اس معاملے کی جانچ چل رہی ہے۔ قصور وار کے خلاف سخت کارروائی کی جائے گی۔‘‘
معراج اس وقت حیدرآباد فٹبال کلب کے اسسٹنٹ کوچ ہیں۔ اس سے قبل وہ موہن بگان، ایسٹ بنگال، سلگائوکر، پونے سیٹی، چنئین، اور ممبئی سٹی کی فٹبال ٹیموںکی نمائندگی کر چکے ہیں۔
معراج قومی فٹبال ٹیم میں 2005 سے 2011 تک مڈ فیلڈر اور ڈیفینڈر کے طور پر کھیل چکے ہیں۔ اس دوران وہ اپنے شاندار کھیل کے باعث بین الاقوامی سطح پر پذیرائی حاصل کر چکے ہیں۔
