سخت ترین حفاظتی حصار اور ٹھنڈ کے بیچ آج یوم جمہوریہ کی تقریب سے قبل پہاڑی ضلع شوپیان کی ڈسٹرکٹ پولیس لائینز میں فل ڈریس ریہرسل کی گئی۔
وادی کشمیر کے دوسرے حصوں کی طرح جنوبی ضلع شوپیان بھی سخت سیکورٹی انتظامات کے بیچ یوم جمہوریہ کی فل ڈریس ریہرسل تقریب کا انعقاد کیا گیا۔
فل ڈریس ریہرسل کے موقع پر ایڈیشنل ڈپٹی کمشنر شوپیان ڈاکٹر عبدالعزیز نے ڈسٹرکٹ پولیس لائینز میں پرچم کشائی کی رسم انجام دی اور پریڈ کی سلامی لی۔
سخت سردی کے باوجود مختلف تعلیمی اداروں کے طلباء وطالبات کے ساتھ ساتھ مرکزی نیم فوجی دستے، جموں وکشمیر پولیس، یوتھ سروسز اینڈ اسپورٹس، فائر اینڈ ایمرجنسی سروس اور فاریسٹ پروٹیکشن فورس نے بھی پریڈ میں حصہ لیا۔
تقریب میں فنکاروں اور طالب علموں نے ثقافتی پروگرام بھی پیش کئے، ایڈیشنل ڈپٹی کمشنر نے لاک ڈاؤن کے دوران متعدد محکموں کے ذریعہ ترقیاتی کاموں کو انجام دینے پر روشنی ڈالی اور کووڈ-19 کے دوران پورے پورے عزم اور لگن سے کام کرنے والے محکموں کی ستائش کی، انہوں نے بتایا کہ ان کی وجہ سے آج ہمارے ضلع میں کووڈ-19 کے کیسوں کا اعداد و شمار صفر ہے اور ویکسینیشن کا عمل جاری ہے۔
