جنوبی کشمیر کے ضلع شوپیاں کے پنجورہ گاؤں میں پینے کے صاف پانی پر گاؤں کے لوگوں میں جھڑپ ہوئی جس کے بعد پولیس نے علاقے میں پہنچ کر فائرنگ کی جس کی وجہ سے کئی افراد زخمی ہوئے ہیں۔
تفصیلات کے مطابق پنجورہ علاقے کے شیخ ساز محلہ کے لوگوں کو کئی برسوں سے پینے کے صاف پانی کی قلت ہے جس کے خلاف انہوں نے دو روز قبل آرہامہ شوپیاں میں سرینگر شوپیاں روڈ کو بند کرکے زبردست احتجاج کیا۔
اس کے بعد ضلع انتظامیہ نے انہیں یقین دلایا کہ کچھ ہی روز میں اس علاقے کے لوگوں کو پینے کا پانی فراہم کیا جائے گا۔ آج جب محکمہ جل شکتی کے اہلکار پنجورہ علاقے میں پہنچے تو اس گاؤں کے دوسرے محلہ جن میں بنہ پورہ، ہیرپورہ، رییت پور اور مییر پورہ کے لوگ شامل ہیں نے اس پر اعتراض کیا۔
یہ بھی پڑھیں: ڈوڈہ: بٹوگڑھ پنچایت میں پانی کی قلّت
ان محلہ کے لوگوں کے مطابق انہیں بھی کم مقدار میں پینے کا پانی فراہم کیا جاتا ہے اور اب اگر اسی پائپ لائن سے شیخ ساز محلہ کو پانی دیا جائے گا تو انہیں بھی بعد میں پانی نہیں ملے گا۔ اس بات کو لے کر گاؤں کے لوگوں میں لڑائی جھگڑا شروع ہوا جس کے بعد پولیس اہلکار اس علاقے میں پہنچ گئے۔ لوگوں نے پولیس اہلکاروں پر پتھراؤ کیا جنہوں نے جواب میں آنسو گیس کے گولے داغے ساتھ ہی پیلٹ بھی چلائے۔ اس کی وجہ سے کئی افراد زخمی ہوئے۔
