جموں و کشمیر کے ضلع رامبن میں چملواس بانہال کے لوگوں نے جموں سرینگر قومی شاہراہ بند کر کے پبلک ہیلتھ انجینیئرینگ ڈپارٹمنٹ (پی ایچ ای) کے خلاف زبردست احتجاج کیا۔
چملواس کے لوگوں کا کہنا ہے کہ پچھلے کئی برسوں سے پانی دستیاب نہ ہونے کی وجہ سے کافی مشکلات کا سامنا کرنا پڑ رہا ہے۔ گاؤں کے لوگوں نے متعدد دفعہ آر پی ایچ آئی اے کے افسروں کو شکایت بھی درج کرائی اس کے باوجود ابھی تک چملواس کے لوگوں کو پینے کے لیے صاف پانی فراہم نہیں کیا جا سکا ہے۔
احتجاج کر رہے لوگوں نے گھنٹوں تک جموں سرینگر قومی شاہراہ کو بند رکھا تھا جس کی وجہ سے شاہراہ پر آمدورفت بھی گھنٹوں تک متاثر رہی۔
پولیس کی یقین دہانی کے بعد مقامی لوگوں نے اپنا احتجاج ختم کیا اور انتظامیہ کو متنبہ کیا کہ اگر جلد از جلد پانی فراہم نہیں کیا گیا تو دوبارہ سڑکوں پر احتجاج کرنے کے لیے مجبور ہوں گے۔
